جادو ٹونے سے نہیں ملک محنت سے ترقی کرےگا، وزیراعظم شہباز شریف

اسلام آباد میں وزیر اعظم شہباز شریف کا کہنا ہے کہ جادو ٹونے سے نہیں، بلکہ محنت سے ملک ترقی کرے گا۔ انہوں نے کہا کہ دہشت گردی اور معاشی ترقی کی کاوشیں ساتھ نہیں چل سکتیں۔

میں نے پوری پی ٹی آئی کو لٹو کی طرح نچایا ہوا ہے، فیصل واوڈا

وزیر اعظم شہباز شریف نے اسلام آباد میں علما کنونشن سے خطاب کیا۔ اس کنونشن میں چیف آف ڈیفنس فورسز فیلڈ مارشل سید عاصم منیر نے بھی شرکت کی۔ وزیر اعظم شہباز شریف کا کہنا تھا کہ قوم میں یکجہتی کی فضا قائم ہونے تک ملک ترقی نہیں کر سکتا۔ انہوں نے کہا کہ پاکستان کی معیشت آج تیزی سے ترقی کی جانب گامزن ہے۔ ان کا کہنا تھا کہ اگر افواج کی قربانیوں کا مذاق اڑایا جائے گا تو پھر پاکستان کی عزت کون کرے گا۔

وزیر اعظم کا کہنا تھا کہ اگر افواج پاکستان کے خلاف زہر آلود پراپیگنڈا کیا جائے تو فوج کا دفاع کرنا حکومت اور علما کرام سمیت سب کی ذمہ داری ہے۔ انہوں نے کہا کہ معرکہ حق میں عظیم فتح حاصل ہوئی اور اس معرکہ حق میں قوم کی دعائیں قبول ہوئیں۔ ان کا کہنا تھا کہ افواج کے ہر سپاہی کی معرکہ حق میں بے مثال کاوشیں شامل ہیں۔

انہوں نے کہا کہ فیلڈ مارشل عاصم منیر نے بھارت کے خلاف جنگ کو جرأت سے لیڈ کیا۔ ان کا کہنا تھا کہ مسلح افواج کی جرأت اور بہادری سے دشمن کو عبرتناک شکست ہوئی۔ انہوں نے کہا کہ ملک کو دیوالیہ ہونے سے بچانے کے لیے سیاسی و عسکری قیادت نے کردار ادا کیا۔

وزیر اعظم کا کہنا تھا کہ ملک میں فرقہ پرستی کا خاتمہ ضروری ہے۔ انہوں نے کہا کہ اب بھی بعض مکاتب فکر کے لوگ کہتے ہیں کہ اس مسجد میں اس کے پیچھے نماز نہیں پڑھ سکتے۔ انہوں نے کہا کہ خوارج کے حملوں میں معصوم پاکستانی شہید ہو رہے ہیں اور ان شہیدوں نے جان قربان کر کے کئی بچوں کو یتیم ہونے سے بچا لیا۔