پنجاب میں امن و امان کا غیر معمولی اجلاس؛ انتہا پسند جماعت پر پابندی کی سفارش کا فیصلہ

لاہور:
پنجاب حکومت نے ریاستی رِٹ اور قانون کی بالادستی قائم کرنے کے لیے اہم اور تاریخی فیصلے کیے ہیں۔

وزیراعلیٰ مریم نواز شریف کی زیر صدارت امن و امان سے متعلق خصوصی اجلاس میں یہ طے کیا گیا کہ پنجاب حکومت وفاق کو ایک انتہا پسند جماعت پر پابندی عائد کرنے کی سفارش کرے گی۔
ملک میں پیٹرولیم مصنوعات کی قیمتوں میں کمی کر دی گئی،کتنی ؟ جانئے
اجلاس میں فیصلہ کیا گیا کہ صوبے میں نفرت انگیزی، اشتعال انگیزی اور قانون شکنی میں ملوث افراد کے خلاف فوری کارروائی کی جائے گی۔

پولیس افسران کی شہادت اور سرکاری املاک کو نقصان پہنچانے میں ملوث رہنماؤں اور کارکنوں کے خلاف دہشت گردی کی عدالتوں میں مقدمات چلائے جائیں گے۔

انتہا پسند جماعت کی قیادت کو انسداد دہشت گردی ایکٹ کے فورتھ شیڈول میں شامل کیا جائے گا، جبکہ جماعت کی تمام جائیدادیں اور اثاثے محکمہ اوقاف کے سپرد کیے جائیں گے۔ اس کے علاوہ پوسٹرز، بینرز اور اشتہارات پر مکمل پابندی ہوگی۔

فیصلے کے مطابق، نفرت انگیز مواد پھیلانے والے سوشل میڈیا اکاؤنٹس بند کیے جائیں گے اور جماعت کے تمام بینک اکاؤنٹس منجمد کر دیے جائیں گے۔

مزید برآں، لاؤڈ اسپیکر ایکٹ کی خلاف ورزی پر سخت کارروائی عمل میں لائی جائے گی۔