اسلام آباد: وفاقی حکومت میں ممکنہ تبدیلی سے متعلق حالیہ قیاس آرائیوں کو باخبر ذرائع نے بے بنیاد قرار دیتے ہوئے کہا ہے کہ اسلام آباد اور راولپنڈی کے درمیان تعلقات انتہائی خوشگوار ہیں، اور عسکری قیادت وزیرِاعظم شہباز شریف کی قیادت پر مکمل اعتماد رکھتی ہے۔
سوشل میڈیا اور سیاسی حلقوں میں حالیہ دنوں بعض غیر مصدقہ اطلاعات گردش کرتی رہیں، جن میں یہ دعویٰ کیا گیا کہ ایک وفاقی وزیر کو وزیرِاعظم شہباز شریف کی جگہ لانے پر غور کیا جا رہا ہے۔ تاہم، سینئر حکومتی عہدیدار نے ان دعوؤں کی سختی سے تردید کرتے ہوئے کہا کہ اسلام آباد اور پنڈی کے تعلقات بدستور مضبوط ہیں، اور موجودہ سیٹ اپ کو مکمل حمایت حاصل ہے۔
حکومتی اور سیکیورٹی اسٹیبلشمنٹ سے وابستہ ذرائع نے واضح کیا کہ سیاسی سیٹ اپ میں کسی فوری تبدیلی کا امکان نہیں، اور عسکری قیادت شہباز شریف کی قیادت پر مکمل اعتماد رکھتی ہے۔ ان کے بقول فی الحال کسی سیاسی تبدیلی کی نہ خواہش ہے نہ ضرورت۔
سیاسی تجزیہ کاروں کا کہنا ہے کہ پاکستان میں سول و عسکری تعلقات کی پیچیدہ تاریخ اور ماضی کی انجینئرنگ کی وجہ سے ایسی افواہیں وقتاً فوقتاً گردش کرتی رہتی ہیں، تاہم موجودہ صورتحال میں کسی بڑی تبدیلی کا کوئی امکان نہیں۔
ذرائع کا کہنا ہے کہ اس وقت حکومت اور اسٹیبلشمنٹ کی تمام تر توجہ معیشت کی بحالی اور سیکیورٹی چیلنجز سے نمٹنے پر مرکوز ہے، لہٰذا کسی بھی قسم کی سیاسی تبدیلی غیر متوقع ہے۔
قبل ازیں "دی نیوز” کی رپورٹ میں دعویٰ کیا گیا تھا کہ وزیرِاعظم شہباز شریف اور آرمی چیف جنرل عاصم منیر کے درمیان دو طرفہ اعتماد پر مبنی مضبوط تعلق قائم ہے۔ جنرل عاصم منیر کی قیادت میں عسکری ادارے کو شہباز شریف میں ایک ایسا قائد ملا ہے جس پر نہ صرف اعتماد کیا جا سکتا ہے بلکہ عملی طور پر تعاون بھی ممکن ہے۔
ایک سینئر ذریعے کے مطابق شہباز شریف نے اپنی کارکردگی، محنت، نظم و ضبط، سفارتی مہارت اور ملکی طاقت کے نظام کی سوجھ بوجھ سے عسکری قیادت کا اعتماد حاصل کیا ہے۔ بند دروازوں کے پیچھے کوئی ابہام نہیں، فوج شہباز شریف کو سیاسی غیر یقینی اور معاشی چیلنجز کے تناظر میں پاکستان کے لیے بہترین انتخاب سمجھتی ہے۔
یہ اعتماد یکطرفہ نہیں ہے۔ وزیرِاعظم شہباز شریف نے بھی متعدد مواقع پر آرمی چیف کی پیشہ ورانہ صلاحیت، نظم و ضبط اور قومی وژن کی کھل کر تعریف کی ہے، اور مختلف مواقع پر حکومت کو درپیش چیلنجز سے نمٹنے میں فوج کی غیر متزلزل حمایت کا اعتراف کیا ہے۔
