پاکستان اور ویسٹ انڈیز کے درمیان تین میچوں پر مشتمل ون ڈے سیریز کے دوسرے میچ میں ویسٹ انڈیز نے پاکستان کو آسانی سے 5 وکٹوں سے شکست دے کر سیریز 1-1 سے برابر کر دی۔ بارش کے باعث میچ کو 35 اوورز تک محدود کیا گیا۔ پاکستان نے پہلے کھیلتے ہوئے 37 اوورز میں 7 وکٹوں کے نقصان پر 171 رنز بنائے، جس کے بعد ڈک ورتھ لوئس میتھڈ کے تحت ویسٹ انڈیز کو 181 رنز کا ہدف دیا گیا۔ میزبان ٹیم نے مطلوبہ ہدف 33.2 اوورز میں 5 وکٹوں کے نقصان پر حاصل کر لیا۔
پاکستان کی جانب سے حسن نواز 36 رنز کے ساتھ نمایاں بلے باز رہے، حسین طلعت نے 31، عبداللہ شفیق نے 26، اور صائم ایوب نے 23 رنز بنائے۔ دیگر کھلاڑیوں میں محمد رضوان نے 16، سلمان آغا نے 9، محمد نواز نے 5 رنز بنائے جبکہ کپتان بابر اعظم بغیر کوئی رن بنائے آؤٹ ہوئے۔ شاہین شاہ آفریدی 11 رنز کے ساتھ ناٹ آؤٹ رہے۔
ویسٹ انڈیز کی جانب سے جیڈن سیلز نے 7 اوورز میں 23 رنز دے کر 3 وکٹیں حاصل کیں، جبکہ روسٹن چیز، شمار جوزف، گڈاکیش موتی اور بلیڈز نے ایک، ایک وکٹ حاصل کی۔
ہدف کے تعاقب میں ویسٹ انڈیز کی پہلی وکٹ 11 رنز پر گری جب برینڈن کنگ ایک رن بنا کر حسن علی کی گیند پر آؤٹ ہوئے۔ ایون لوئس 7 رنز بنا کر محمد رضوان کے ہاتھوں کیچ آؤٹ ہوئے۔ تیسری وکٹ 63 رنز پر گری جب کیچے کیرٹی 16 رنز بنا کر ابرار احمد کا شکار بنے۔ شائے ہوپ 32 رنز بنا کر محمد نواز کی گیند پر اسٹمپ ہوئے۔
روسٹن چیز 49 اور شرفین ردرفورڈ 45 رنز بنا کر ناٹ آؤٹ رہے اور ٹیم کو فتح دلوائی۔ پاکستان کی جانب سے حسن علی اور محمد نواز نے دو، دو وکٹیں حاصل کیں جبکہ ابرار احمد نے ایک وکٹ لی۔
سیریز اب 1-1 سے برابر ہو چکی ہے اور فیصلہ کن تیسرا میچ منگل کو کھیلا جائے گا۔ پہلے میچ میں پاکستان نے ویسٹ انڈیز کو 5 وکٹوں سے شکست دی تھی۔ اگر ویسٹ انڈیز یہ سیریز ہارتا ہے تو اس کی 2027 ورلڈ کپ میں براہ راست رسائی خطرے میں پڑ سکتی ہے۔
