فیلڈ مارشل عاصم منیر نے امریکا کے سرکاری دورے کے دوران اعلیٰ سطحی سیاسی اور عسکری قیادت سے اہم ملاقاتیں کیں۔ پاک فوج کے شعبہ تعلقات عامہ (آئی ایس پی آر) کے مطابق، دورے کے دوران انہوں نے پاکستانی نژاد امریکی کمیونٹی سے بھی ملاقات کی اور انہیں پاکستان کے روشن مستقبل پر اعتماد رکھنے کی تلقین کی۔
فیلڈ مارشل نے ٹیمپا میں امریکی سینٹکام کے کمانڈر جنرل مائیکل کی ریٹائرمنٹ تقریب میں شرکت کی اور انہیں خراجِ تحسین پیش کیا۔ کمانڈ تبدیلی کی تقریب میں بھی شرکت کی، جہاں ایڈمرل بریڈ کوپر نے نئی کمان سنبھالی۔
اس دورے کے دوران فیلڈ مارشل عاصم منیر نے چیئرمین جوائنٹ چیفس آف اسٹاف جنرل ڈین کین سے ملاقات کی، جس میں پیشہ ورانہ دلچسپی کے امور پر تبادلہ خیال ہوا۔ ملاقات میں انہوں نے جنرل ڈین کین کو پاکستان کے دورے کی دعوت بھی دی۔
