کل احتجاج میں لوگ کیوں نہیں پہنچے اس پر پارٹی اور عمران خان سے بات کرونگا: سلمان اکرم

راولپنڈی – پاکستان تحریک انصاف (پی ٹی آئی) کے رہنما سلمان اکرم راجہ نے کل ہونے والے احتجاج میں عوام کی کم تعداد میں شرکت پر تشویش کا اظہار کرتے ہوئے کہا ہے کہ وہ اس معاملے پر پارٹی قیادت اور عمران خان سے مشاورت کریں گے۔

اڈیالہ جیل کے باہر میڈیا سے گفتگو کرتے ہوئے سلمان اکرم راجہ نے توشہ خانہ ٹو کیس کے ٹرائل کو مکمل طور پر غیر آئینی اور غیر قانونی قرار دیا۔ ان کا کہنا تھا کہ سائفر کیس میں بھی میڈیا، وکلا اور فیملی کو عدالت میں داخلے سے روک دیا گیا، حالانکہ ہائیکورٹ کی واضح ہدایات ہیں کہ ان افراد کو رسائی نہ دینا اوپن ٹرائل کی نفی ہے۔

انہوں نے اعتراف کیا کہ احتجاج مزید مؤثر ہو سکتا تھا اور آئندہ ایسا کیا جائے گا۔ ان کا کہنا تھا: "میں اور محمود اچکزئی کل رات 11 بجے تک عمران خان کی بہنوں کے ساتھ چکری انٹرچینج پر موجود رہے۔ اگر عمران خان کی کال پر کوئی ایم این اے بغیر معقول وجہ کے شرکت نہ کرے تو اس سے جواب طلب کیا جائے گا۔”

سلمان اکرم راجہ نے کہا کہ وہ جاننا چاہتے ہیں کہ لوگ احتجاج میں کیوں شریک نہیں ہوئے، اور اس پر پارٹی کے اندر بات ہوگی۔

دوسری جانب پی ٹی آئی کے چیئرمین بیرسٹر گوہر اور خیبر پختونخوا کے مشیر اطلاعات بیرسٹر سیف نے احتجاج کو کامیاب قرار دیا ہے۔ بیرسٹر گوہر کے مطابق ملک کے 170 اضلاع، تمام تحصیلوں اور یونین کونسلز میں بھرپور احتجاج کیا گیا، جو اس بات کا ثبوت ہے کہ عوام اب بھی بانی پی ٹی آئی کے ساتھ کھڑے ہیں۔