ٹیکس چھوٹ پر آئی ایم ایف کا انکار: حکومت نے 3 لاکھ ٹن چینی کی درآمد کا ٹینڈر واپس لے لیا

0

اسلام آباد میں حکومت نے درآمدی چینی پر دی گئی ٹیکس چھوٹ پر آئی ایم ایف کے اعتراضات کے بعد چینی کی درآمد کے لیے جاری کردہ ٹینڈر واپس لے لیا ہے۔ ابتدائی طور پر ٹریڈنگ کارپوریشن آف پاکستان (ٹی سی پی) نے 3 لاکھ ٹن چینی کی درآمد کے لیے ٹینڈر جاری کیا تھا، تاہم اب صرف 50 ہزار میٹرک ٹن چینی کی درآمد کا نیا ٹینڈر جاری کیا گیا ہے، جس کے لیے بین الاقوامی سپلائرز سے 22 جولائی تک بولیاں طلب کی گئی ہیں۔

حکومت نے پہلے 5 لاکھ ٹن چینی درآمد کرنے کا حتمی فیصلہ کیا تھا اور اس پر تمام درآمدی ڈیوٹیز کو ختم کر دیا گیا تھا، مگر آئی ایم ایف نے ٹیکس چھوٹ پر اعتراض اٹھایا جس کے بعد یہ فیصلہ واپس لیا گیا۔

دوسری جانب، چینی کی قیمت میں بھی نمایاں اضافہ دیکھا گیا ہے۔ ذرائع کے مطابق، چینی کی ایکس مل قیمت میں مارچ 2025 کے مقابلے میں 25 روپے فی کلو اضافہ ہوا ہے۔ جون 2024 میں چینی کی قیمت 140 روپے فی کلو مقرر کی گئی تھی، جو اب شوگر ملز کے ساتھ معاہدے کے تحت 165 روپے فی کلو ہو چکی ہے۔

کابینہ دستاویزات سے معلوم ہوتا ہے کہ مارچ میں حکومت نے چینی کی قیمت 159 روپے فی کلو مقرر کی تھی، جبکہ اب وزارت نیشنل فوڈ سکیورٹی نے نئی ایکس مل قیمت کا اعلان کر دیا ہے۔

واضح رہے کہ حکومت نے جون تا اکتوبر 2024 کے دوران مجموعی طور پر ساڑھے 7 لاکھ ٹن چینی برآمد کرنے کی اجازت دی تھی، جس کے ساتھ ہی مقامی مارکیٹ میں قیمتوں میں اضافے کا رجحان بھی سامنے آیا ہے۔

Leave A Reply

Your email address will not be published.