بھارت ریاستی دہشتگردی کا ماسٹر مائنڈ، پاکستان کی سلامتی پر حملے ناقابل برداشت: ڈی جی آئی ایس پی آر

ڈی جی آئی ایس پی آر لیفٹیننٹ جنرل احمد شریف چوہدری نے الجزیرہ ٹی وی کو دیے گئے خصوصی انٹرویو میں کہا ہے کہ بھارت نے ریاستی سرپرستی میں دہشتگردی کو پاکستان کے خلاف ایک باقاعدہ پالیسی کے طور پر اپنا رکھا ہے۔ انہوں نے کہا کہ بھارت کے یہ مذموم عزائم پاکستان کی سلامتی، بالخصوص بلوچستان کو غیر مستحکم کرنے کی منظم سازش کا حصہ ہیں۔

الجزیرہ کے مطابق، ڈی جی آئی ایس پی آر کا یہ بیان گزشتہ ماہ وزیرستان میں ہونے والے بم دھماکے کے بعد سامنے آیا ہے۔ حملے کی ذمہ داری دہشتگرد تنظیم فتنہ الخوارج (طالبان) نے قبول کی تھی۔ اس حملے میں 16 فوجی جوان شہید جبکہ 20 سے زائد افراد زخمی ہوئے تھے۔ پاکستان نے ان حملوں میں بھارت کے براہ راست ملوث ہونے کا واضح مؤقف اختیار کیا ہے۔ الجزیرہ کے مطابق، بھارت پاکستان میں دہشتگردوں کی حمایت اور مالی معاونت کر رہا ہے۔

ڈی جی آئی ایس پی آر نے انٹرویو میں کہا کہ "خارجیوں” کی اصطلاح ان گروہوں کے لیے استعمال ہو رہی ہے جو ریاست اور فوج پر حملے کر رہے ہیں۔ موجودہ فتنہ الخوارج اس گمراہ نظریے کا تسلسل ہے جو مسلمانوں کو اپنے باطل عقائد کی بنیاد پر قتل کرتے آئے ہیں۔ انہوں نے کہا کہ اسلام میں جہاد یا قتال کا اختیار صرف ریاست کے پاس ہے، کسی فرد، تنظیم یا گروہ کو یہ اختیار حاصل نہیں۔

انہوں نے مزید کہا کہ فتنہ الخوارج کا اسلام، انسانیت، پاکستان یا پاکستانی روایات سے کوئی تعلق نہیں ہے۔ ان دہشتگرد عناصر کو بھارت کی مکمل حمایت حاصل ہے، اور انہیں "فتنہ الہندوستان” کہا جاتا ہے۔ یہ گروہ خصوصاً بلوچستان میں پاکستان کو غیر مستحکم کرنے کے مشن پر کام کر رہے ہیں۔

لیفٹیننٹ جنرل احمد شریف نے کہا کہ پاکستان نے اسلامی ریاست کے خلاف کسی بھی جارحیت کو پورے خطے کے استحکام کے لیے خطرہ قرار دیا ہے۔ ان کا کہنا تھا کہ بھارت کی سیاسی قیادت نے متعدد مواقع پر پاکستان میں دہشتگردی کی پشت پناہی کا اعتراف کیا ہے۔ بھارتی سرپرستی میں ہونے والی دہشتگردی کے نیٹ ورک کا ماسٹر مائنڈ اجیت دوول ہے، اور امریکہ و کینیڈا سمیت کئی ممالک بھی اس بھارتی ریاستی دہشتگردی کا اعتراف کر چکے ہیں۔

الجزیرہ کے مطابق ڈی جی آئی ایس پی آر نے اسرائیلی جارحیت کا نشانہ بننے والے ایران کے لیے پاکستان کی سیاسی و سفارتی حمایت کا اعادہ بھی کیا۔ انٹرویو میں انہوں نے پاکستان کے ایٹمی پروگرام کے حوالے سے بات کرتے ہوئے کہا کہ پاکستان کا ایٹمی پروگرام مکمل طور پر محفوظ ہے اور کوئی بھی اسے نشانہ بنانے کی جرات نہیں کر سکتا۔ پاکستان ایک ذمہ دار اور اعلان شدہ ایٹمی طاقت ہے، اور اس کی جوہری صلاحیت ناقابل تسخیر ہے۔ یہ پاکستان کی دفاعی صلاحیتوں اور موجودہ علاقائی توازن پر اعتماد کی عکاسی کرتا ہے۔