بھارت کی جانب سے آرٹیکل370 کی منسوخی اقوام متحدہ اور عالمی برادری کیلئے چلینج ہے:نذیر احمد قریشی

لندن(نیوزڈیسک)کشمیر کمپین گلوبل کے سرپرست اعلیٰ اور ورلڈ کشمیر فریڈم موومنٹ کے بانی رہنما و برطانیہ میں تحریک آزادی کشمیر کے سفیر نذیر احمد قریشی نے کہا ہے کہ بھارت کی جانب سے5 اگست2019 میں آرٹیکل370 اور35اے کی منسوخی جہاں اقوام متحدہ کے چارٹر اور بین الاقوامی اصولوں کی خلاف ورزی ہے،وہیں عالمی برادری کیلئے کھلا چلینج بھی ہے۔کیونکہ مسئلہ کشمیر ایک تسلیم شدہ متنازعہ عالمی مسئلہ ہے اور بھارت اس کی متنازعہ حیثیت کو تبدل نہیں کرسکتا۔
لندن سے جاری کیے گئے اپنے ایک بیان میں کشمیری رہنما نے کہا ہے کہ مودی حکومت نے آرٹیکل 370 کی منسوخی کے بعد کشمیری عوام کو خوفزدہ کرکے دہشت پھیلائی ہے،مگر کشمیری عوام اپنی تحریک آزادی سے دستبردار نہیں ہوئے،جو بھارت کیلئے رسوائی کا باعث ہے۔

انہوں نے کہا کہ مودی حکومت کی جانب سے آرٹیکل 370 کی منسوخی اصل میں کشمیری عوام کی عزت و شناخت کو مجروح اور مقبوضہ جموں و کشمیر کی مسلم اکثریت کو ہندو اقلیت میں بدلنا ہے۔جس کا عالمی سطح پر نوٹس لیا جانا ضروری ہے۔

نذیر احمد قریشی نے کہا کہ مقبوضہ جموں وکشمیر کی تاریخ میں 05 اگست2019 سیاہ ترین دن ہے۔گزشتہ پانچ برسوں سے مقبوضہ جموں وکشمیر میں انسانی حقوق کی خلاف ورزیوں میں بڑے پیمانے پر اضافہ ہوا ہے ،ہزاروں کشمیری نوجوان بشمول پوری حریت قیادت بھارتی جیلوں میں مقید ہے ،جبکہ سینکڑوں افراد بھارتی دہشت گردی کی بھینٹ چڑھ گئے، اس کے علاوہ درجنوں کشمیری مسلمان ملازمین کو ان کی نوکریوں سے برطرف،جائیداد و املاک اور رہائشی مکانات کو قبضے میں لینے کا سلسلہ بھی جاری ہے،یہ ہتھکنڈے بھی آباد کار منصوبے کا حصہ ہیں،جس کا مقصد غیر ریاستی افراد باالخصوص ہندوئوں کیلئے راستہ ہموار کرنا ہے۔

انہوں نے مزید کہا کہ بین الاقوامی برادری کی ذمہ داری ہے کہ وہ مقبوضہ جموں و کشمیرمیں بھارتی ا فواج کی جارحانہ کارروائیوں اور مودی حکومتی اقداامات کو لگام دے،کیونکہ بھارت تنازعہ کشمیر کے پرامن حل کی عالمی اپیلوں کو مسلسل نظر انداز کر رہا ہے۔جو نہ صرف برصغیر جنوبی ایشیا بلکہ پوری دنیا کے امن کیلئے سنگین خطرہ ہے۔