اسلام آباد میں سابق ڈی جی آئی ایس آئی فیض حمید نے ملٹری کورٹ سے ملنے والی سزا کے خلاف اپیل دائر کر دی ہے۔ لیفٹیننٹ جنرل ریٹائرڈ فیض حمید کے وکیل میاں علی اشفاق نے اس بات کی تصدیق کی ہے کہ فوجی عدالت کی جانب سے سنائی گئی سزا کے خلاف 27 دسمبر کو اپیل دائر کر دی گئی ہے، تاہم انہوں نے اس حوالے سے مزید تفصیلات بتانے سے گریز کیا۔
وزیراعظم شہباز شریف کی روسی صدر ولادیمیر پیوٹن کی رہائشگاہ کو نشانہ بنانے کی مذمت
یاد رہے کہ فیلڈ جنرل کورٹ مارشل نے سابق ڈی جی آئی ایس آئی فیض حمید کو آفیشل سیکریٹ ایکٹ کی خلاف ورزی، اختیارات کے غلط استعمال اور پاکستان آرمی ایکٹ کی خلاف ورزی پر 14 برس قید با مشقت کی سزا سنائی تھی۔ ڈی جی آئی ایس پی آر لیفٹیننٹ جنرل احمد شریف چوہدری نے 11 دسمبر کو ایک پریس کانفرنس کے دوران ملٹری کورٹ کی جانب سے دی گئی سزا کے بارے میں بتایا تھا، ان کا کہنا تھا کہ 12 اگست 2024 کو فیض حمید کے خلاف ملٹری ایکٹ کے تحت تحقیقات کا آغاز کیا گیا اور پھر 15 ماہ کی طویل تفتیش کے بعد انہیں سزا سنائی گئی۔ پاکستان آرمی ایکٹ کی دفعہ 133 بی کے تحت سزا اور فیصلہ سنائے جانے کے بعد انہیں فیلڈ جنرل کورٹ مارشل کے فیصلے کے خلاف اپیل دائر کرنے کے لیے 40 دن کی مہلت حاصل تھی۔ قوانین کے مطابق فوجی عدالت کی سزا کے خلاف دائر اپیل کا آرمی چیف کی جانب سے بنائی گئی کورٹ آف اپیلز جائزہ لے گی اور پھر جائزے کے بعد آرمی چیف کو اس بات کا اختیار ہے کہ وہ اس اپیل کو منظور کر لیں، مسترد کر دیں، معطل کر دیں یا پھر اس میں ردو بدل کے احکامات جاری کریں۔ ذرائع کے مطابق دائر کی گئی اپیل میں موقف اختیار کیا گیا ہے کہ فیض حمید کو سزا خلاف قانون اور غلط بنیاد پر دی گئی ہے، پراسیکیوشن اپنا مقدمہ ثابت کرنے میں ناکام رہی اور مقدمے کے شفاف ٹرائل کو بھی نظر انداز کیا گیا ہے۔
