‘کارولینا پولیٹیکل ریویو’ کی ایک رپورٹ کے مطابق پاکستان نے اپنی جغرافیائی اہمیت، دفاعی صلاحیتوں اور سفارتی اقدامات کا فائدہ اٹھاتے ہوئے 2025 میں عالمی سطح پر اپنی تزویراتی اہمیت کو کامیابی سے بحال کر لیا ہے۔
اسلام آباد میں یکم جنوری سے ایم ٹیگ کے بغیر گاڑیوں کے داخلے پر پابندی عائد کرنے کا فیصلہ
رپورٹ میں بین الاقوامی سیاست میں پاکستان کی مضبوط پوزیشن کو اجاگر کیا گیا ہے، خاص طور پر بھارت کے ساتھ مئی کے تنازع کے بعد جس نے پاکستان کی فوجی لچک کا مظاہرہ کیا اور اس کی ساکھ میں اضافہ کیا۔ اس عرصے کے دوران مؤثر سفارت کاری نے واشنگٹن میں پاکستان کا اعتماد بحال کرنے میں بھی مدد کی جس سے دوطرفہ تعلقات کو نئی جلا ملی۔
کارولینا پولیٹیکل ریویو نے نوٹ کیا کہ جنوبی ایشیا، وسطی ایشیا، مغربی ایشیا اور مشرق وسطیٰ کے سنگم پر پاکستان کے محل وقوع نے اسے علاقائی جیو پولیٹکس میں ایک اہم کھلاڑی بنا دیا ہے۔ بلوچستان میں گوادر بندرگاہ جیسے اسٹریٹجک اثاثوں نے ملک کی اہمیت کو مزید بڑھا دیا ہے جس سے بندرگاہوں اور معدنیات کے تعاون کے ساتھ ساتھ سی پیک سے وابستہ معاشی مواقع کی راہیں بھی کھل گئی ہیں۔
رپورٹ میں امریکی ٹرمپ انتظامیہ کی قومی سلامتی کی حکمت عملی کا بھی حوالہ دیا گیا ہے جو پاکستان کو امریکی عالمی مفادات کے فروغ میں ایک کلیدی شراکت دار کے طور پر تسلیم کرتی ہے۔ بھارت اور پاکستان کے درمیان بڑھتی ہوئی کشیدگی کے دوران امریکہ نے تناؤ کم کرنے میں فعال کردار ادا کیا جس سے پاکستان کے بڑھتے ہوئے سفارتی اثر و رسوخ کا پتہ چلتا ہے جبکہ اس معاملے میں بھارت پیچھے رہا۔
معاشی اور تزویراتی محاذ پر پاکستان اور امریکہ نے 500 ملین ڈالر کے معاہدوں پر دستخط کیے ہیں جن میں نایاب زمینی دھاتیں، معدنیات کی صفائی اور پروسیسنگ شامل ہیں۔ مزید برآں، ایگزیم (EXIM) بینک نے بلوچستان کے علاقے ریکوڈک میں معدنیات کے منصوبوں کے لیے 1.25 بلین ڈالر کی فنانسنگ کی منظوری دی ہے جو نئی سرمایہ کاری اور روزگار کے مواقع کا اشارہ ہے۔ کارولینا پولیٹیکل ریویو نے نوٹ کیا کہ 2025 میں امریکہ کے ساتھ پاکستان کی تزویراتی سفارت کاری اور اقتصادی شمولیت نے ایک اہم علاقائی اداکار کے طور پر اس کے کردار کو مزید تقویت دی ہے۔
