**سپریم کورٹ نے مرحوم سرکاری ملازمین کے ورثا کو ملازمت دینے کے سندھ حکومت کے احکامات برقرار رکھے**
اسلام آباد: سپریم کورٹ نے مرحوم سرکاری ملازمین کے ورثا کو کوٹے کے تحت ملازمت دینے سے متعلق سندھ حکومت کی درخواستیں مسترد کر دی ہیں اور سندھ ہائی کورٹ کے فیصلے برقرار رکھے ہیں۔
جسٹس محمد علی مظہر، جسٹس اطہر من اللہ اور جسٹس صلاح الدین پنہور پر مشتمل تین رکنی بینچ نے کیس کی سماعت کی۔ عدالت نے واضح کیا کہ جن مقدمات کا تصفیہ پہلے ہی ہو چکا ہے، انہیں دوبارہ نہیں کھولا جا سکتا۔
متحدہ عرب امارات کے قابل احترام صدر کا پہلا سرکاری دورہ باعث فخر ہے، مریم نواز
سپریم کورٹ نے ریمارکس دیے کہ سندھ ہائی کورٹ کے احکامات میں کوئی قانونی خامی موجود نہیں ہے۔ مرحوم سرکاری ملازمین کے ورثا کو ملازمت دینے کے فیصلے حتمی حیثیت اختیار کر چکے ہیں، اور مرحوم کوٹہ سے متعلق قوانین کی منسوخی کا اطلاق ماضی پر نہیں ہوگا۔
عدالت نے مزید کہا کہ جنرل پوسٹ آفس کیس کا فیصلہ پہلے نمٹائے گئے معاملات پر لاگو نہیں ہوگا۔ عدالتی فیصلے اصولاً مستقبل پر لاگو ہوتے ہیں، جب تک کہ واضح طور پر ماضی پر اطلاق کا حکم نہ دیا جائے۔
یاد رہے کہ سندھ ہائی کورٹ نے 2019 سے 2023 کے درمیان مرحوم سرکاری ملازمین کے ورثا کو کوٹے کے تحت ملازمت دینے کے احکامات جاری کیے تھے، جنہیں سندھ حکومت نے سپریم کورٹ میں چیلنج کیا تھا۔ اب سپریم کورٹ کے فیصلے کے بعد ہائی کورٹ کے احکامات حتمی ہو گئے ہیں۔
