لاہور: پنجاب میں چار سال کے وقفے کے بعد آٹھویں جماعت کے سالانہ بورڈ امتحانات مارچ 2026 میں منعقد ہوں گے۔
پنجاب کے وزیر تعلیم رانا سکندر حیات خان نے بتایا ہے کہ پنجاب ایگزامینیشن کمیشن فار ٹیسٹ اینڈ اسیسمنٹ (پیکٹا) کی جانب سے سالانہ بورڈ امتحانات کا شیڈول تیار کر لیا گیا ہے، جس کے تحت امتحانات 5 مارچ 2026 سے شروع ہوں گے۔
وزیر تعلیم کے مطابق پیکٹا نے امتحانات کی تیاری کے لیے عملی اقدامات کا آغاز کر دیا ہے اور صوبے بھر میں ایک ہی پیٹرن کے تحت امتحانات کا انعقاد کیا جائے گا تاکہ یکساں اور شفاف نظام کو یقینی بنایا جا سکے۔
پیکٹا حکام کا کہنا ہے کہ امتحانی انتظامات کے سلسلے میں تمام ڈسٹرکٹ ایجوکیشن اتھارٹیز سے فوکل پرسنز کی نامزدگیاں طلب کر لی گئی ہیں، جبکہ امتحانات کے مؤثر اور منظم انعقاد کے لیے دیگر انتظامی امور کو بھی حتمی شکل دی جا رہی ہے۔
