انسانی حقوق کی عالمی تنظیم ایمنسٹی انٹرنیشنل انڈیا نے کہا ہے کہ کسی عوامی عہدیدار کی جانب سے کسی خاتون کا حجاب یا نقاب زبردستی ہٹانا اس کی عزت، شناخت اور ذاتی آزادی پر حملہ ہے۔
تنظیم کے بیان میں کہا گیا ہے کہ ایسے اقدامات نہ صرف خواتین کے بنیادی حقوق کی خلاف ورزی ہیں بلکہ معاشرے میں خوف اور عدم تحفظ کے ماحول کو بھی ہوا دیتے ہیں۔ انہوں نے زور دیا کہ عوامی عہدیداروں کو مذہبی آزادی اور خواتین کے وقار کا احترام کرنا چاہیے۔
دنیا کے امیر ترین شخص ایلون مسک نے دولتمندی کا نیا ریکارڈ بنا دیا
یہ بیان بھارتی ریاست بہار کے وزیراعلیٰ نتیش کمار کے ایک حالیہ واقعے کے بعد سامنے آیا ہے، جہاں انہوں نے پٹنہ میں ایک تقریب کے دوران ایک مسلمان خاتون ڈاکٹر کا نقاب کھینچ دیا تھا۔ اس واقعے کی ویڈیوز سوشل میڈیا پر وائرل ہونے کے بعد شدید ردعمل دیکھنے میں آیا۔
بھارت میں انسانی حقوق کے کارکنوں اور سماجی رہنماؤں نے اس واقعے کو اقلیتی خواتین کے تحفظ کے حوالے سے تشویشناک قرار دیا ہے اور فوری، شفاف قانونی کارروائی کا مطالبہ کیا ہے۔
اپوزیشن جماعت کانگریس نے بھی اس اقدام کی شدید مذمت کرتے ہوئے کہا ہے کہ کسی خاتون کے مذہبی شناخت کے ساتھ اس طرح کا رویہ ناقابل قبول ہے۔ وزیراعلیٰ کے خلاف ہراسمنٹ کا مقدمہ درج کرنے کا مطالبہ بھی زور پکڑ رہا ہے۔
