بالی وڈ اداکار سنجے دت نے 1993 میں غیر قانونی اسلحہ رکھنے کے کیس اور جیل میں گزارے گئے اپنے تجربات کے بارے میں بات کی ہے۔ بھارتی میڈیا کو دیے گئے ایک انٹرویو میں انہوں نے بتایا کہ بابری مسجد کے واقعے کے بعد ان کی فیملی کو دھمکیاں دی جا رہی تھیں، اور ان کے والد اور بہنوں کو خطرات لاحق تھے۔
پنجاب: ڈرائیونگ کی عمر 16 سال مقرر، مستقبل میں ای چالان مزید سخت کرنے کا فیصلہ
سنجے دت نے کہا کہ ان پر الزام تھا کہ ان کے پاس بندوق موجود تھی، لیکن یہ الزام ثابت نہیں ہو سکا۔ انہوں نے اس بات پر حیرت ظاہر کی کہ 25 سال بعد بھی انہیں بندوق نہ ہونے کے باوجود مجرم قرار دیا گیا۔ سنجے دت نے کہا کہ بم دھماکا کیس میں ان کی بے گناہی ثابت کرنے میں اتنی تاخیر نہیں ہونی چاہیے تھی، تاہم انہوں نے اسے اپنی زندگی کا حصہ سمجھ کر اس سے سبق سیکھنے کی کوشش کی۔
جیل میں انہوں نے اپنا زیادہ تر وقت مذہبی اور قانونی کتابیں پڑھنے میں صرف کیا۔ انہوں نے عدالت سے درخواست کی تھی کہ کیس کی کارروائی تیز کی جائے اور جلد ختم کیا جائے، چاہے فیصلہ کچھ بھی ہو۔
سنجے دت نے جیل کی سرگرمیوں کا بھی ذکر کیا، بتایا کہ انہوں نے اجرت حاصل کی، ایک ریڈیو اسٹیشن شروع کیا، اور دیگر قیدیوں کی مدد سے شو کے لیے اسکرپٹ تیار کیے۔ انہوں نے جیل میں ایک چھوٹا تھیٹر گروپ بھی قائم کیا جس کا وہ ڈائریکٹر تھے اور قتل کے مجرم اس کے فنکار تھے۔
واضح رہے کہ 12 مارچ 1993 کو ممبئی میں بم دھماکوں کے بعد سنجے دت کو غیر قانونی اسلحہ رکھنے کا مجرم قرار دیا گیا تھا، اور 2013 میں بھارتی عدالت نے انہیں پانچ سال قید کی سزا سنائی تھی۔
