بلوچستان کے ضلع کیچ کی تحصیل بلیدہ کے علاقے جاڑین سے چار نوجوانوں کی مسخ شدہ لاشیں برآمد ہوئی ہیں۔ یہ نوجوان تقریباً ایک ہفتہ قبل پکنک منانے کے لیے گئے تھے اور اس کے بعد سے لاپتہ تھے۔ لاشوں کی برآمد نے علاقے میں خوف و ہراس پھیلا دیا ہے۔
خطرے سے دوچار ہمپ بیک وہیل کا بڑا گروہ بلوچستان کے ساحل پر نمودار
قتل ہونے والے نوجوانوں کی شناخت ذاکر ولد عبداللہ، رزاق ولد عبداللہ، صادق اور پیرجان کے ناموں سے ہوئی ہے۔ تین نوجوان زردان کوچہ بلیدہ کے رہائشی تھے، جبکہ ایک کا تعلق بٹ کورے پشت جاڑین بازار سے تھا۔ اہل علاقہ کے مطابق یہ نوجوان پکنک کے لیے نکلے تھے اور اسی دن سے ان کے موبائل فون بند ہو گئے تھے۔
لاشوں کی اطلاع ملتے ہی لواحقین اور مقامی افراد پہاڑی علاقے کی طرف پہنچے، جہاں لاشیں برآمد ہوئیں۔ ذرائع کے مطابق لاشیں بری طرح مسخ شدہ حالت میں تھیں اور نوجوانوں کی موٹر سائیکلیں بھی جلا دی گئی تھیں۔
یہ واقعہ بلوچستان میں انسانی حقوق کی پامالیوں اور جبری گمشدگیوں کے سلسلے کی ایک اور المناک کڑی کے طور پر دیکھا جا رہا ہے۔ متاثرہ خاندانوں نے مطالبہ کیا ہے کہ واقعے کی شفاف تحقیقات کی جائیں اور ذمہ داروں کو سزا دی جائے۔ پولیس اور انتظامیہ کی جانب سے ابھی تک کوئی سرکاری بیان جاری نہیں کیا گیا ہے۔
