اسلام آباد:
سال 2025 کے دوران ملک کے مختلف ایئرپورٹس پر جہازوں سے پرندوں کے ٹکرانے کے واقعات میں نمایاں اضافہ ریکارڈ کیا گیا ہے۔
قومی ایئرلائن کے مطابق رواں سال جنوری سے ستمبر تک 90 برڈ اسٹرائکس رپورٹ ہوئیں، جب کہ گزشتہ سال اسی عرصے کے دوران 83 واقعات پیش آئے تھے۔ صرف ستمبر میں 26 برڈ اسٹرائکس رپورٹ ہوئیں، جو ایک ماہ میں ہونے والا تشویشناک اضافہ ہے۔ لاہور اور اسلام آباد کے ایئرپورٹس ان واقعات میں سب سے آگے رہے۔
رپورٹ کے مطابق رواں سال کراچی میں 9، لاہور میں 16 اور اسلام آباد میں 15 برڈ اسٹرائکس کے واقعات پیش آئے۔ ان میں سے 8 طیاروں کو نقصان پہنچا جبکہ 82 معمولی نوعیت کے واقعات تھے۔ زیادہ تر واقعات لینڈنگ اور اپروچ کے دوران ہوئے، جن میں لینڈنگ کے وقت 21 اور اپروچ کے دوران 14 کیسز ریکارڈ کیے گئے۔
گزشتہ سال حکومت نے کتنا غیر ملکی قرضہ لیا؟ تفصیلات پیش
ایئر لائن حکام کے مطابق اے320 طیارے کے ساتھ سب سے زیادہ، یعنی 68 برڈ اسٹرائکس کے واقعات پیش آئے۔ ان واقعات میں اضافے سے نجی ایئرلائنز کی پروازوں کے شیڈول پر بھی اثر پڑا اور کئی پروازوں کو تاخیر اور فنی معائنے کا سامنا کرنا پڑا۔
برڈ اسٹرائکس میں اضافہ ایئرپورٹس کے اردگرد صفائی اور فضلہ کنٹرول کے ناکافی انتظامات کا نتیجہ قرار دیا گیا ہے۔ پی آئی اے کے سیفٹی ڈپارٹمنٹ نے برڈ کنٹرول سسٹم کو مزید مؤثر بنانے کی سفارش کی ہے۔
ذرائع کے مطابق نجی ایئرلائنز کے برڈ اسٹرائکس کے واقعات پی آئی اے کے مقابلے میں دوگنا رہے، جن کی مجموعی تعداد 180 تک پہنچ گئی۔
پاکستان ایئرپورٹس اتھارٹی نے کہا ہے کہ پرندوں کے تدارک اور فضائی سلامتی کے لیے عالمی معیار کے مطابق اقدامات کیے جا رہے ہیں۔ برڈ اسٹرائکس ایک عالمی مسئلہ ہیں جو موسم، شہری آبادی کے پھیلاؤ اور ماحولیاتی تبدیلیوں سے بھی جڑے ہوئے ہیں۔ ادارے کے مطابق متعلقہ محکموں کے ساتھ مل کر ایئرپورٹس کے اطراف صفائی اور نظم و نسق بہتر بنانے کے اقدامات جاری ہیں تاکہ خطرات میں کمی لائی جا سکے۔
