پاکستان کرکٹ بورڈ (پی سی بی) نے آئندہ سیزن 2025-26 سے قبل تمام ریجنل کھلاڑیوں کے لیے فٹنس ٹیسٹ کو لازمی قرار دے دیا ہے۔ اس پالیسی کے تحت اگست میں سٹرینتھ اینڈ کنڈیشننگ کوچز تقریباً 400 ریجنل کھلاڑیوں کا فٹنس جائزہ لیں گے۔
ڈیپارٹمنٹل کرکٹ ٹیموں کے لیے بھی فٹنس ٹیسٹ کو لازم قرار دیا گیا ہے۔ یہ پہلا موقع ہوگا جب پی سی بی خود ان ٹیموں کے فٹنس ٹیسٹ لے گا۔ اس کے علاوہ پاتھ وے اور ایج گروپ کرکٹ کے لیے بھی نئی فٹنس پالیسی متعارف کروائی گئی ہے۔
پی سی بی کے کوچ یاسر ملک کا کہنا ہے کہ تمام ڈومیسٹک کرکٹرز کے لیے ضروری ہے کہ وہ فٹنس ٹیسٹ پہلی یا دوسری کوشش میں پاس کریں۔ ان کا کہنا تھا کہ ڈومیسٹک کرکٹ باصلاحیت کھلاڑیوں کی نرسری ہے اور معیار پر کسی صورت سمجھوتہ نہیں کیا جائے گا۔
