ریسلنگ کے معروف لیجنڈ ہلک ہوگن دل کا دورہ پڑنے کے باعث 71 سال کی عمر میں انتقال کر گئے۔ انہیں 2005 میں ڈبلیو ڈبلیو ای ہال آف فیم میں شامل کیا گیا تھا۔ ریسلنگ کے طویل کیریئر کے دوران وہ کئی بار سرجری کے عمل سے بھی گزرے۔
عالمی میڈیا رپورٹس کے مطابق، ٹی ایم زیڈ نے اطلاع دی ہے کہ کلیئر واٹر، فلوریڈا میں ایمرجنسی سروسز کو دل کا دورہ پڑنے کی اطلاع ملی، جس کے بعد میڈیکل ٹیم فوری طور پر موقع پر پہنچی۔ ہلک ہوگن کو بے ہوش حالت میں پایا گیا، جنہیں موقع پر ہی سی پی آر دی گئی، لیکن اسپتال منتقل کیے جانے کے باوجود وہ جانبر نہ ہو سکے۔
اسپتال میں ان کی شناخت ٹری جین بولیا کے نام سے ہوئی، جو دنیا بھر میں ہلک ہوگن کے نام سے مشہور تھے۔ وہ نہ صرف ایک کامیاب ریسلر تھے بلکہ ریسلنگ کی دنیا میں ایک ثقافتی علامت کی حیثیت رکھتے تھے۔ انہوں نے اپنے شاندار کیریئر کے دوران کئی چیمپئن شپ ٹائٹلز جیتے اور ڈبلیو ڈبلیو ای کو بین الاقوامی سطح پر مقبول بنانے میں مرکزی کردار ادا کیا۔
ہلک ہوگن 1980 اور 1990 کی دہائی میں ڈبلیو ڈبلیو ای کے سب سے بڑے سپر اسٹارز میں شمار ہوتے تھے، اور ان کی شخصیت نے ریسلنگ انڈسٹری کو ایک نئی پہچان دی۔ ان کے انتقال پر دنیا بھر سے ریسلنگ کے شائقین اور ان کے ساتھیوں نے گہرے رنج و غم کا اظہار کیا ہے۔
