پشاور: خیبرپختونخوا اسمبلی کا اجلاس کورم پورا نہ ہونے کے باعث 24 جولائی، جمعرات دوپہر 2 بجے تک ملتوی کر دیا گیا۔
اسپیکر کے پی اسمبلی بابر سلیم سواتی نے بتایا کہ اجلاس گورنر خیبرپختونخوا نے صوبائی حکومت کی ایڈوائس پر ریکوزیشن کے تحت طلب کیا تھا، تاہم اجلاس کے آغاز پر تحریک انصاف کے رکن شیر علی آفریدی نے کورم کی نشاندہی کر دی، جس کے بعد اجلاس ملتوی کرنا پڑا۔
اسپیکر نے اعلان کیا کہ کورم پورا نہ ہونے کے باعث اراکین کی حلف برداری بھی ممکن نہیں ہو سکی۔ اجلاس کے دوران جیسے ہی کورم کی نشاندہی کی گئی، اپوزیشن اراکین نے شور شرابا شروع کر دیا، تاہم اسپیکر نے کہا کہ ضابطے کے مطابق ارکان کی گنتی کی جائے گی۔ گنتی کے بعد بتایا گیا کہ ایوان میں صرف 25 ارکان موجود ہیں، جو کورم پورا کرنے کے لیے ناکافی ہیں۔ اس پر اسپیکر نے گھنٹیاں بجانے کی ہدایت دی اور بعد ازاں اجلاس ملتوی کر دیا۔
قبل ازیں، پاکستان تحریک انصاف کی پارلیمانی پارٹی کا اجلاس چیف وہپ اکبر ایوب کی صدارت میں ہوا، جس میں اسپیکر بابر سلیم سواتی اور ڈپٹی اسپیکر ثریا بی بی بھی شریک ہوئیں۔ اجلاس میں فیصلہ کیا گیا کہ پی ٹی آئی ارکان اسمبلی اجلاس کا بائیکاٹ کریں گے۔
پارلیمانی پارٹی کے فیصلے کے تحت پی ٹی آئی کے رکن عبدالغنی آفریدی کو اسمبلی گیٹ پر تعینات کیا گیا، جو دروازے پر کھڑے ہو کر پارٹی کے دیگر ارکان کو اجلاس میں شرکت سے روک کر واپس بھیجتے رہے۔
اجلاس میں مخصوص نشستوں پر منتخب ہونے والے اراکین کی حلف برداری سے متعلق آئندہ کا لائحہ عمل بھی زیر غور آیا۔
