اوپن اے آئی نے چیٹ جی پی ٹی کے لیے ایک انقلابی فیچر متعارف کرایا ہے جو اس مصنوعی ذہانت پر مبنی چیٹ بوٹ کو نیم خودمختار ڈیجیٹل اسسٹنٹ میں تبدیل کر رہا ہے۔
اس نئے فیچر کا مظاہرہ اوپن اے آئی کے سی ای او سام آلٹمین اور ان کی ٹیم نے ایک لائیو اسٹریم کے دوران کیا، جس میں انہوں نے چیٹ جی پی ٹی کے نئے ایجنٹ ٹول کو استعمال کرتے ہوئے اس کی صلاحیتیں دکھائیں۔
یہ ٹول اوپن اے آئی کے موجودہ آپریٹر ٹول کی طرز پر کام کرتا ہے، تاہم اس میں ڈیپ ریسرچ کی صلاحیت بھی شامل کر دی گئی ہے، جس سے یہ پہلے سے کہیں زیادہ مؤثر اور بااختیار بن گیا ہے۔
یہ نیا چیٹ جی پی ٹی ایجنٹ صارف کے کمپیوٹر پر خودکار طور پر مختلف ٹاسک مکمل کر سکتا ہے، جیسے:
- کیلنڈر مینج کرنا
- پاورپوائنٹ پریزنٹیشنز چلانا
- ویب سائٹس پر انسان کی طرح سرچ کرنا
- کمپیوٹر فائلز اور سافٹ ویئرز تک رسائی حاصل کرنا
یہ ایجنٹ صرف معلومات فراہم کرنے تک محدود نہیں، بلکہ آپ کی ہدایات پر حقیقی دنیا کے اقدامات بھی خود انجام دے سکتا ہے۔ مثال کے طور پر اگر آپ کسی دوسرے شہر کا سفر کرنا چاہتے ہیں، تو یہ نہ صرف وہاں ہوٹلوں کی تلاش کرے گا بلکہ ان کی قیمت، سہولیات اور آپ کے شیڈول کے مطابق موزونیت بھی بتائے گا۔
یہ فیچر فی الحال ماہانہ سبسکرپشن والے صارفین کے لیے دستیاب ہے، جن میں چیٹ جی پی ٹی پلس، پرو اور ٹیم پلان شامل ہیں۔ صارفین اسے چیٹ جی پی ٹی کے ٹول مینو میں موجود ایجنٹ موڈ کے ذریعے ایکٹیویٹ کر سکتے ہیں۔
یہ اپ ڈیٹ چیٹ جی پی ٹی کے روایتی انداز کو مکمل طور پر بدل دے گی۔ پہلے صارف کو معلومات حاصل کرنے کے بعد خود ایپلیکیشنز کھولنی پڑتی تھیں، اب چیٹ جی پی ٹی خود یہ سب کچھ کرے گا — مثلاً آپ کہیں کہ کسی ریسٹورنٹ میں ٹیبل بک کروانی ہے، تو یہ نہ صرف ریسٹورنٹس تجویز کرے گا بلکہ آپ کے کیلنڈر سے مطابقت رکھتے ہوئے وقت بھی تجویز کرے گا۔
مختصراً، چیٹ جی پی ٹی کا یہ نیا ایجنٹ ٹول ایک ذہین، فعال اور خودکار اسسٹنٹ بن چکا ہے، جو نہ صرف وقت بچاتا ہے بلکہ زندگی کو مزید منظم بنانے میں بھی مدد فراہم کرتا ہے۔
