اسلام آباد(نیوزڈیسک)ایف آئی اے نے جعلی اور غیر رجسٹرڈ ادویات کی فروخت میں ملوث عناصر کے خلاف کریک ڈاون کر کے بھاری مقدار میں جعلی اور غیر رجسٹرڈ ادویات برآمدکرلیں۔
ترجمان ایف آئی اے نے بتایاکہ ایف آئی اے اینٹی کرپشن سرکل اسلام آباد نے بڑی کاروائی کرتے ہوئے جعلی اور غیر رجسٹرڈ ادویات کی فروخت میں ملوث عناصر کو دھر لیا ہے ۔
ترجمان کے مطابق ڈپلومیٹک انکلیو اسلام آباد میں واقع عیسی جی نامی میڈیکل سٹور میں چھاپہ مار کاروائی کی گئی ،چھاپے کے دوران جعلی اور غیر رجسٹرڈ ادویات برآمدکرلی گئیں ۔
ترجمان نے بتایاکہ چھاپہ مار کارروائی میں ڈسٹرکٹ ڈرگ انسپکٹر اور دیگر ڈریپ حکام بھی شامل تھے ۔
ترجمان نے بتایاکہ جعلی اور غیر رجسٹرڈ ادویات کو ڈرگ انسپکٹر کی موجودگی میں قبضے میں لے لیا گیا۔
انہوں نے بتایاکہ مذکورہ ادویات بلیک مارکیٹ میں مہنگے داموں فروخت کی جارہی تھیں۔مذکورہ ادویات کو ڈریپ حکام کے حوالے کر دیا گیا۔
ملزمان کے خلاف انکوائری درج کر کے تحقیقات کا آغاز کر دیا گیا۔
ڈریپ حکام کی رپورٹ کی روشنی میں ملزمان کے خلاف مزید قانونی کاروائی عمل میں لائی جائی گی۔
ترجمان نے کہاکہ جعلی اور غیر رجسٹرڈ ادویات میں ملوث عناصر کے خلاف سخت کاروائیوں کا آغاز کر دیا گیا ہے،ملزمان کی گرفتاری کے لئے خصوصی چھاپہ مار ٹیمیں تشکیل دے دی گئی ہیں۔
چھاپہ مار ٹیمیں ڈرگ ریگولیٹری اتھارٹی آف پاکستان کے ساتھ مشترکہ کاروائیاں کر رہی ہیں۔
ترجمان نے بتایاکہ کسی شخص کو بھی معصوم لوگوں کی زندگیوں سے کھیلنے کی اجازت نہیں ہےملزمان کی گرفتاری کے لئے تمام تر وسائل بروئے کار لائے جا رہے ہیں۔
