وزیراعظم شہباز شریف نے ایشیا کپ جیتنے والی قومی انڈر نائنٹین کرکٹ ٹیم کے ہر کھلاڑی کے لیے ایک ایک کروڑ روپے انعام کا اعلان کر دیا۔
قومی کھلاڑیوں کے اعزاز میں منعقدہ ظہرانے سے خطاب کرتے ہوئے وزیراعظم شہباز شریف نے کہا کہ نوجوان کھلاڑیوں نے پاکستان کا سر فخر سے بلند کیا اور مخالف ٹیم کو ایسی شکست دی جس کا وہ تصور بھی نہیں کر سکتی تھی۔ ان کا کہنا تھا کہ بنیان مرصوص کے دوران اللہ تعالیٰ نے پاکستان کو فتح سے نوازا اور اسی مخالف کو میدان میں شکست دے کر ملک کی عزت میں اضافہ کیا گیا۔
واشنگٹن کا ’’انڈیا فرسٹ‘‘ دور ختم، 2025 پاک امریکا تعلقات میں انقلابی تبدیلی کا سال قرار
وزیراعظم نے فائنل میں بھارت کو شکست دینے پر ٹیم کی شاندار کارکردگی کو سراہتے ہوئے سمیر منہاس اور علی رضا کی خصوصی تعریف کی اور آئندہ ماہ ہونے والے انڈر نائنٹین ورلڈ کپ کے لیے ٹیم کو نیک تمناؤں کا اظہار کیا۔ انہوں نے کہا کہ نوجوانوں نے بھارت کو شکست دے کر تاریخ رقم کی ہے اور امید ہے کہ مستقبل میں بھی وہ ملک کا نام روشن کرتے رہیں گے۔
دوسری جانب پاک فوج کے شعبہ تعلقات عامہ آئی ایس پی آر کے مطابق چیف آف ڈیفنس فورسز اور آرمی چیف فیلڈ مارشل سید عاصم منیر سے جی ایچ کیو میں پاکستان انڈر نائنٹین کرکٹ ٹیم نے ملاقات کی۔ آئی ایس پی آر کے مطابق فیلڈ مارشل نے ایشیا کپ انڈر نائنٹین جیتنے پر کھلاڑیوں، ٹیم مینجمنٹ اور آفیشلز کو مبارکباد دی اور ٹیم کے نظم و ضبط، باہمی تعاون اور جرات مندانہ کھیل کو سراہا۔
فیلڈ مارشل سید عاصم منیر نے اس کامیابی کو پوری قوم کے لیے باعثِ فخر قرار دیتے ہوئے کھلاڑیوں کو مسلسل اعلیٰ کارکردگی برقرار رکھنے کی تلقین کی۔ آئی ایس پی آر کے مطابق فیلڈ مارشل نے کہا کہ کھلاڑی پیشہ ورانہ معیار کو برقرار رکھیں اور میدان کے اندر اور باہر پاکستان کے سفیر بن کر رہیں۔
انہوں نے مزید کہا کہ پاکستان کے نوجوان ہی قوم کے مستقبل کی بنیاد ہیں اور نوجوانوں کی توانائی، صلاحیت اور کردار ملک کی ترقی اور عالمی سطح پر اس کے وقار کی تشکیل میں اہم کردار ادا کریں گے۔ آئی ایس پی آر کے مطابق قومی انڈر نائنٹین کرکٹ ٹیم نے حوصلہ افزائی اور سرپرستی پر فیلڈ مارشل سید عاصم منیر کا شکریہ ادا کیا اور کہا کہ اس اعزاز سے انہیں مزید محنت اور بہتر کارکردگی کے لیے زبردست حوصلہ ملا ہے۔
