چیئرمین پاکستان کرکٹ بورڈ محسن نقوی کی صدارت میں پی سی بی بورڈ آف گورنرز کا اجلاس ویڈیو لنک کے ذریعے منعقد ہوا، جس میں کرکٹ انفراسٹرکچر، پاکستان سپر لیگ، ڈومیسٹک کرکٹ اور آئندہ بین الاقوامی ایونٹس سے متعلق اہم فیصلے کیے گئے۔
اجلاس میں نیشنل کرکٹ اسٹیڈیم کراچی کی تعمیرِ نو کے دوسرے مرحلے کی باضابطہ منظوری دی گئی، جبکہ لاہور کے ایل سی سی اے گراؤنڈ کو لندن کے اوول گراؤنڈ کی طرز پر اپ گریڈ کرنے کا بھی فیصلہ کیا گیا۔ بورڈ آف گورنرز نے ایل سی سی اے گراؤنڈ کی اپ گریڈیشن کی منظوری دیتے ہوئے انفراسٹرکچر کی بہتری پر زور دیا۔
اجلاس کے دوران پی ایس ایل لندن اور نیویارک روڈ شوز کی کامیابی پر چیئرمین پی سی بی محسن نقوی اور ان کی ٹیم کی کارکردگی کو سراہا گیا۔ بورڈ نے سری لنکن ٹیم کے حالیہ دورہ پاکستان کو جاری رکھنے کے لیے چیئرمین پی سی بی کی ذاتی کاوشوں کو خراجِ تحسین پیش کیا، جبکہ محسن نقوی کے حق میں اظہارِ تشکر کی قرارداد بھی متفقہ طور پر منظور کی گئی۔
اس موقع پر محسن نقوی نے کہا کہ سری لنکن دورے کو جاری رکھنے کا کریڈٹ کسی ایک فرد کو نہیں بلکہ پوری ٹیم کو جاتا ہے۔ انہوں نے کہا کہ اخلاص اور مسلسل محنت کے نتیجے میں اللہ تعالیٰ نے کامیابی عطا کی۔ ان کا کہنا تھا کہ پی ایس ایل روڈ شوز کی کامیابی پی سی بی اور پی ایس ایل کی مشترکہ کوششوں کا نتیجہ ہے اور لیگ کو ایک عالمی برانڈ بنانے کے لیے تمام ٹیم نے دن رات محنت کی۔
گھوٹکی؛ بس سے اغوا کیے گئے 11 مسافر بازیاب، پولیس آپریشن جاری
چیئرمین پی سی بی نے بتایا کہ کوشش کی جا رہی ہے کہ پی ایس ایل 11 کے میچز مظفرآباد اسٹیڈیم میں کرائے جائیں، جبکہ مستقبل میں مظفرآباد میں بین الاقوامی میچز کے انعقاد کا بھی منصوبہ ہے۔ انہوں نے اسلام آباد میں ایک جدید اور اسٹیٹ آف دی آرٹ کرکٹ اسٹیڈیم کی تعمیر کا اعلان بھی کیا۔
اجلاس کو آگاہ کیا گیا کہ ریجنل سطح پر ایک معروف نجی فرم نے کلبز کی سکروٹنی کا عمل شروع کر دیا ہے۔ چیف ایگزیکٹو آفیسر پی ایس ایل سلمان نصیر نے پی ایس ایل روڈ شوز کے حوالے سے بورڈ کو تفصیلی بریفنگ دی۔
بورڈ آف گورنرز کو آئندہ آئی سی سی ویمنز اور مینز کرکٹ ٹورنامنٹس، ڈومیسٹک کرکٹ کے ڈھانچے کو مضبوط بنانے اور نچلی سطح پر ٹورنامنٹس اور میچز کی تعداد بڑھانے سے متعلق منصوبوں پر بھی آگاہ کیا گیا۔
اجلاس میں بورڈ آف گورنرز کے ممبران اسماعیل قریشی، طارق سرور، سجاد علی کھوکھر، انوار غنی، ظہیر عباس اور تنویر احمد شریک ہوئے، جبکہ پی سی بی کے سینئر حکام، چیف آپریٹنگ آفیسر سمیر احمد، چیف ایگزیکٹو آفیسر پی ایس ایل سلمان نصیر، چیف فنانشل آفیسر اور دیگر متعلقہ افسران نے بھی اجلاس میں شرکت کی۔
