سری لنکا نے رواں سال ہونے والی لنکا پریمیئر لیگ (ایل پی ایل) ملتوی کر دی۔
سری لنکا کرکٹ کی جانب سے جاری بیان میں کہا گیا ہے کہ اس سال ایل پی ایل کا انعقاد نہیں ہوگا۔
موسیقی سے کوئی تعلق نہیں پھر بھی جج بن گئے، حمیرا ارشد کی فواد خان پر تنقید
بیان کے مطابق یہ فیصلہ آئندہ ورلڈکپ کی تیاریوں پر مکمل توجہ دینے کے لیے کیا گیا ہے، جب کہ ایل پی ایل 2025 کسی اور مناسب ونڈو میں کرائی جائے گی۔
ایل پی ایل 2025 کا انعقاد ابتدائی طور پر یکم دسمبر سے 23 دسمبر تک ہونا طے پایا تھا۔
آئی سی سی گائیڈ لائنز کے مطابق، ورلڈکپ کے لیے تمام وینیوز کا بہترین حالت میں ہونا لازمی ہے۔ لیگ ملتوی کرنے کے فیصلے سے گراؤنڈز کے انفراسٹرکچر کی اپ گریڈیشن میں مدد ملے گی تاکہ میگا ایونٹ کا کامیاب انعقاد کیا جا سکے۔
شائقین کے لیے اسٹینڈز کو جدید سہولیات سے آراستہ کیا جائے گا جبکہ کھلاڑیوں کے ڈریسنگ رومز اور ٹریننگ ایریاز کو بھی بہتر بنایا جائے گا۔
سری لنکا کرکٹ کے مطابق اس وقت 3 وینیوز پر تعمیر و مرمت کا کام جاری ہے، تاہم کولمبو اسٹیڈیم میں ویمنز ورلڈکپ کے میچز کی وجہ سے ترقیاتی کام عارضی طور پر روکا گیا ہے۔
یاد رہے کہ آئندہ برس فروری اور مارچ میں ٹی ٹوئنٹی ورلڈکپ مشترکہ طور پر بھارت اور سری لنکا میں کھیلا جائے گا۔
