دمبولا(نیوزڈیسک)ویمنز ہیڈ کوچ محمد وسیم نے کہا ہے کہ پہلے میچ میں ہمیں مشکل ہوئی کیونکہ ہم اپنے پلان پر عمل نہیں کرسکے۔
اپنے ایک بیان میں انہوں نے کہاکہ پہلے میچ کے بعد ٹیم کی کارکردگی میں بہتری آئی ہے۔ ہم صحیح ڈائریکشن میں جارہے ہیں۔آنے والے میچوں میں اچھی سائیڈز کے خلاف اسی مائنڈ سیٹ سے کھیلنا ہوگا۔
ان کا کہنا تھا کہ اگر ہمیں ان لڑکیوں سے بہترین پرفارمنس لینی ہے تو انہیں آزادی دینی ہوگی تاکہ وہ کھل کر اپنا ٹیلنٹ پیش کرسکیں۔ بولنگ ہمارا مضبوط شعبہ ہے فیلڈنگ اور بیٹنگ میں بھی بہتری نظر آرہی ہے۔
محمد وسیم نے کہاکہ اگر آپ کو ماڈرن کرکٹ کھیلنی ہے تو اس کے لیے ماڈرن کوچنگ بھی چاہیے۔کیمپ میں جو سخت محنت کی تھی وہ اب کام آرہی ہے۔
انہوں نے کہاکہ ہم چاہتے ہیں کہ ہماری لڑکیاں زیادہ جارحانہ انداز میں بیٹنگ کریں۔ کنڈیشنز اسپنرز کے حق میں ہیں ہماری نوجوان بولرز نے عمدہ بولنگ کی ہے۔
انہوں نے کہاکہ لیفٹ آرم سیمر تسمیہ بولنگ میں اچھا اضافہ ہے۔ یہی سوچ کر یہاں آئے ہیں کہ اس بار ایشیا کپ جیتنا ہے۔
