میٹا نے اپنی سوشل میڈیا ایپس کے درمیان انضمام کو مزید بہتر بنانے کے لیے واٹس ایپ میں ایک نیا دلچسپ فیچر متعارف کروا دیا ہے۔
WABetaInfo کی رپورٹ کے مطابق، واٹس ایپ ایک ایسے فیچر پر کام کر رہا ہے جس کے تحت صارفین اپنی انسٹاگرام یا فیس بک پروفائل تصویر کو براہِ راست واٹس ایپ پر امپورٹ کر کے اپنی پروفائل فوٹو کے طور پر استعمال کر سکیں گے۔
یہ فیچر فی الحال صرف اینڈرائیڈ صارفین کے لیے واٹس ایپ کے بیٹا ورژن میں دستیاب ہے اور اس کا استعمال بھی نہایت آسان ہے۔
صارفین واٹس ایپ کی پروفائل سیٹنگز میں جا کر "پروفائل پکچر ایڈٹ” پر کلک کریں گے، جہاں (اگر فیچر فعال ہوا) انسٹاگرام اور فیس بک سے تصویر منتخب کرنے کے آپشنز موجود ہوں گے۔
اس وقت واٹس ایپ پر پروفائل تصویر کو درج ذیل طریقوں سے تبدیل کیا جا سکتا ہے:
فون گیلری سے تصویر منتخب کر کے
ڈیجیٹل اواتار بنا کر
یا AI سے تیار کردہ تصویر استعمال کر کے
مگر یہ نیا فیچر صارفین کو میٹا کی دیگر ایپس سے پروفائل تصویر درآمد کرنے کی سہولت فراہم کرے گا۔
رپورٹ کے مطابق، یہ فیچر اختیاری ہوگا اور ڈیفالٹ طور پر غیر فعال رہے گا۔
اسے استعمال کرنے کے لیے صارفین کو اپنا واٹس ایپ اکاؤنٹ میٹا اکاؤنٹ سینٹر سے منسلک کرنا ہوگا، تاہم اس سے صارفین کی پرائیویسی متاثر نہیں ہوگی۔
چونکہ فی الحال یہ فیچر آزمائشی (بیٹا) مرحلے میں ہے، اس لیے یہ کہنا قبل از وقت ہے کہ یہ تمام صارفین کے لیے کب دستیاب ہوگا۔
تاہم، توقع کی جا رہی ہے کہ یہ سہولت جلد ہی عام صارفین کے لیے بھی متعارف کروا دی جائے گی، جس سے میٹا کی ایپس کے درمیان رابطہ مزید مؤثر اور مربوط ہو جائے گا۔
