کراچی(نیوزڈیسک)وفاقی وزیرِ خزانہ محمد اورنگ زیب نے کہا ہے کہ آئی ایم ایف کے بڑے پروگرام میں شامل ہو رہے ہیں، اس کے ساتھ مائیکرو اکنامک اسٹیبیلٹی جاری رکھیں گے۔
پاکستان اسٹاک ایکسچینج میں منعقدہ تقریب سے خطاب کرتے ہوئے وفاقی وزیرِ خزانہ محمد اورنگ زیب نے کہا کہ گرم جوش استقبال پر شکریہ ادا کرتا ہوں، آئی ایم ایف حکام سے جلد واشنگٹن میں ملاقات ہو گی۔
ان کا کہنا ہے کہ زرعی شعبے کی نمو 5 فیصد رہی، چاول کی فصل بمپر رہی، گندم کی بھی اچھی خبریں ہیں، کرنٹ اکاؤنٹ کھاتہ بہتر ہے، شرح تبادلہ بھی مستحکم ہے، مہنگائی کی شرح کم ہوئی ہے۔
محمد اورنگ زیب نے کہا کہ یہ ساری کامیابیاں شہباز شریف کے گزشتہ دور کا ایس بی اے معاہدہ ہے، 14 اور 15 اپریل کو آئی ایم ایف سے مذاکرات ہوں گے، نگراں حکومت نے معیشت کی بحالی کے لیے بہتر کام کیے۔
انہوں نے کہا کہ بہتر معاشی پالیسیوں کی بدولت معیشت جلد مستحکم ہو گی، نگراں سیٹ اپ نے ڈاکٹر شمشاد کی سربراہی میں بہتر طریقے سے عمل کیا، 14 اور 15 اپریل کو ورلڈ بینک اور آئی ایم ایف کے اجلاس میں جائیں گے۔
وفاقی وزیرِ خزانہ محمد اورنگ زیب کا کہنا ہے کہ نئے پروگرام کے خدوخال پر بات کریں گے، تفصیلی مذاکرات پاکستان آ کر ہوں گے، ہم جانتے ہیں کیا اور کیوں کرنا ہے۔
انہوں نے مزید کہا کہ پی آئی اے کی نج کاری اور ایئر پورٹس آؤٹ سورسنگ پر اچھی پیش رفت ہوئی ہے، حکومت کا کام پالیسی فریم ورک دینا ہے، نجی شعبے کو لیڈ کرنا ہے۔
وفاقی وزیرِ خزانہ محمد اورنگ زیب کا یہ بھی کہنا ہے کہ ہماری حکمتِ عملی دہری ہے، قلیل اور وسطِ مدت میں نقصانات کم کرنا ہے۔
