اسلام آباد(نیوزڈیسک)وزیر داخلہ محسن نقوی کی ہدایت پر بجلی چوروں کے خلاف سخت کریک ڈاون جاری ہے۔
تفصیلات کے مطابق ایڈیشنل ڈی جی ایف آئی اے نارتھ رانا عبدالجبار نے سی ای او آئیسکو ڈاکٹر امجد خان کے ساتھ اجلاس کی صدارت کی۔
اس موقع پر چیف انجینئر آئیسکو عارف سدوزئی، ڈپٹی ڈائریکٹر اینٹی کرپشن سرکل اسلام آباد محمد افضل خان نیازی اور ڈپٹی ڈائریکٹر انسداد بجلی، گیس چوری یونٹ اسلام آباد رانا شاہد حبیب نے شرکت کی۔
اجلاس میں بجلی چوری کی روک تھام کے حوالے سے خصوصی اقدامات پر غور کیا گیا۔بجلی چوری کے خلاف کریک ڈائون کو مزید تیز کرنے کافیصلہ کیاگیا۔
آئیسکو ریجن میں بجلی چوری کی روک تھام کے لئے مشترکہ حکمت عملی اپنانے کا اعادہ بھی کیا گیا۔
ترجمان ایف آئی اے کے مطابق بجلی چوری میں ملوث ملزمان کے خلاف سخت کاروائیوں کا آغاز کر دیا گیا ہے۔ایف آئی اے کی چھاپہ مار ٹیمیں آئیسکو حکام کے ساتھ مشترکہ کاروائیاں کر رہی ہیں۔بجلی چوری میں واپڈا اہلکاروں کی سہولت کاری کے حوالے سے بھی سخت حکمت عملی اپنائی جا رہی ہے۔
ترجمان نے بتایاکہ ٹیکنیکل رپورٹس کی روشنی میں بجلی چوری میں ملوث واپڈا ملازمین کے خلاف مقدمات درج کئے جا رہے ہیں۔ملزمان کی گرفتاری کے لئے تمام تر وسائل کو بروئے کار لایا جا رہا ہے۔
انہوں نے کہاکہ قومی خزانے کو نقصان پہنچانے والوں کو کیفر کردار تک پہنچایا جائے گا۔
ترجمان ایف آئی اے کے مطابق آئیسکو ناہندگان سے ادائیگیوں کے حوالے سے بھی کاروائیاں تیز کی جائیں گی۔بجلی چوری میں ملوث سہولت کاروں کے خلاف بلا تفریق کاروائیاں جاری رکھنے پر اتفاق کیا گیا۔
