وفاقی وزیر توانائی سردار اویس احمد خان لغاری کی خصوصی ہدایت پر پاور ڈویژن صنعتی صارفین کی سہولت اور بجلی کے مؤثر استعمال کو فروغ دینے کے لیے ایک نئے اختیاری ٹیرف نظام کے اجراء پر غور کر رہا ہے۔ اس حوالے سے وفاقی وزیر کی زیر صدارت متعدد مشاورتی اور تکنیکی اجلاس منعقد ہو چکے ہیں۔
مجوزہ نظام کے تحت صنعتی صارفین کو یہ اختیار حاصل ہوگا کہ وہ ملٹی سلیب ٹیرف ڈھانچے کو اپنائیں، جس میں بجلی کی قیمتوں کا تعین مختلف اوقاتِ کار (ٹائم آف یوز) کے مطابق اوسط مارجنل لاگت کی بنیاد پر کیا جائے گا۔ اس طریقہ کار کا مقصد مختلف اوقات میں بجلی کی حقیقی لاگت کی بہتر عکاسی کرنا ہے۔
مجوزہ ٹیرف دو بنیادی اجزاء پر مشتمل ہوگا:
* فکسڈ چارجز: یہ زیادہ سے زیادہ طلب کی بنیاد پر مقرر کیے جائیں گے اور نسبتاً زیادہ ہوں گے، جس سے صارفین کو اپنی بلند ترین طلب کو بہتر انداز میں منظم اور کم کرنے کی ترغیب ملے گی۔
* متغیر توانائی چارجز: ان چارجز کو نمایاں طور پر معقول بنایا جائے گا اور انہیں بجلی کی حقیقی لاگت کے قریب لایا جائے گا، تاکہ قیمتوں کا تعین زیادہ شفاف اور حقیقت پسندانہ ہو۔
یہ مجوزہ نظام درج ذیل فوائد کا حامل ہوگا:
* صنعتی شعبے میں لوڈ کے مؤثر انتظام کو فروغ دینا، تاکہ صارفین کم لاگت والے اوقات میں اپنی سرگرمیاں ترتیب دے سکیں۔
* آف پیک اوقات میں بجلی کے استعمال میں اضافہ، جس سے نظام کے لوڈ فیکٹر میں بہتری آئے گی۔
* پیک ڈیمانڈ میں کمی کے ذریعے گرڈ پر دباؤ کم کرنا اور مہنگی اضافی پیداواری صلاحیت کی ضرورت میں کمی لانا۔
* توانائی لاگت میں پیش بینی اور ممکنہ کمی کے ذریعے صنعتی پیداوار اور مسابقت کو فروغ دینا۔
مجموعی طور پر یہ ٹیرف اصلاح پاکستان میں پائیدار صنعتی ترقی کے لیے معاون ثابت ہوگی، جو توانائی کے مؤثر استعمال کو یقینی بنانے کے ساتھ ساتھ طویل المدتی معاشی ترقی کی حمایت کرے گی۔
وفاقی وزیر نے تکنیکی سفارشات کا جائزہ لینے کے بعد متعلقہ حکام کو ہدایت جاری کی ہے کہ مجوزہ نظام کو مؤثر اور جامع بنانے کے لیے وسیع پیمانے پر اسٹیک ہولڈرز سے مشاورت کو یقینی بنایا جائے۔
اس سلسلے میں ملک بھر کے صنعتی صارفین، چیمبرز آف کامرس اور تجارتی تنظیموں کے ساتھ مشاورتی عمل کا آغاز کیا جائے گا، جس سے حاصل ہونے والی آراء کی روشنی میں نظام کو مزید بہتر بنایا جائے گا۔
پہلی مشاورتی کانفرنس کل 26 مارچ کو آن لائن منعقد کی جائے گی۔
