اسلام آباد: ادارہ شماریات نے ایک سال کے دوران اشیائے خورونوش کی قیمتوں میں ہونے والے ردو بدل سے متعلق اعداد و شمار جاری کر دیے ہیں۔
اعداد و شمار کے مطابق ایک سال میں چینی کی قیمت میں 16.32 فیصد کا اضافہ ہوا، ملک میں چینی کی اوسط فی کلو قیمت 137.33 روپے تھی جو بڑھ کر اس وقت 159.74 روپے فی کلو ہے۔ 2025 میں چینی کی زیادہ سے زیادہ فی کلو قیمت 229 روپے تک گئی تھی۔ ایک سال میں آٹا 22.56 فیصد مہنگا ہوا، ایک سال قبل آٹے کے 20 کلو تھیلے کی اوسط قیمت 1794روپے 93 پیسے تھی، آٹے کے 20 کلو والے تھیلے کی اوسط قیمت اس وقت 2199 روپے 85 پیسے ہے۔
سہیل آفریدی کا مریم نواز کو خیبرپختونخوا میں جلسہ کرنے کا چیلنج
رپورٹ کے مطابق ایک سال قبل زندہ برائلر چکن کی فی کلو قیمت 409 روپے 22 پیسے تھی، اس وقت ملک میں چکن کی فی کلو اوسط قیمت 424 روپے 89 پیسے ہے۔ بیف 13.01 فیصد، گڑ 12.46 فیصد اور کیلے 11.24 فیصد مہنگے ہوئے جبکہ پسی ہوئی مرچ 10.31اور انڈے 9.71 فیصد مہنگے ہوئے۔
ادارہ شماریات کے مطابق ایک سال کے دوران دودھ پاوڈر 9.51 فیصد مہنگا ہوا جبکہ گیس چارجز 29.85 فیصد بڑھ گئے، جلانے والی لکڑی کی قیمت میں ایک سال میں11.02 فیصد کا اضافہ ہوا۔ 2025 میں مٹن، تازہ دودھ، دہی اور گھی کی قیمتوں میں بھی اضافہ ہوا۔
اعداد و شمار میں بتایا گیا ہے کہ ایک سال میں ٹماٹر 74.92 اور آلو 49.79 فیصد سستے ہوئے، لہسن 38.17 فیصد اور دال چنا 29.66 فیصد سستی ہوئی، پیاز 29.23 اور چائے کی پتی 17.79 فیصد سستی ہوئی۔ ادارہ شماریات کا بتانا ہے کہ دال ماش 13.14 اور دال مسور 6.62 فیصد سستی ہوئی، ایک سال میں بجلی چارجز میں 6.87 فیصد کی کمی ہوئی۔
