معروف روحانی شخصیت اور اصلاحِ نفس کے داعی پیر ذوالفقار احمد نقشبندی جھنگ میں انتقال کر گئے۔
ان کے انتقال پر مذہبی، سیاسی اور سماجی حلقوں کی جانب سے گہرے رنج و غم کا اظہار کیا جا رہا ہے اور مختلف شخصیات نے ان کی دینی، روحانی اور اصلاحی خدمات کو خراجِ تحسین پیش کیا ہے۔
یوکرین کا بڑا یوٹرن: نیٹو رکنیت نہ لینے پر مشروط آمادگی ظاہر کردی
مسلم لیگ ن کے رہنما اور وفاقی وزیر احسن اقبال نے کہا کہ پیر ذوالفقار احمد نقشبندی کے انتقال کی خبر سن کر دلی صدمہ ہوا۔ ان سے عقیدت کا تعلق تھا اور وہ نہایت شفقت فرمانے والی شخصیت تھے۔ احسن اقبال نے کہا کہ مرحوم دینی و روحانی تربیت کا روشن مینار تھے، جنہوں نے اپنی زندگی دینِ اسلام کی خدمت، تزکیۂ نفس اور محبت و اخلاص کے پیغام کو عام کرنے میں گزاری۔
جمعیت علماء اسلام کے سربراہ مولانا فضل الرحمان نے کہا کہ پیر ذوالفقار نقشبندی کا انتقال ہم سب کے لیے مشترکہ سانحہ ہے۔ انہوں نے مرحوم کو تصوف کی آبرو اور علم و عمل کے سالار قرار دیا، جنہوں نے نصف صدی سے زائد عرصے تک تصنیف و تالیف، وعظ و نصیحت اور اصلاحِ معاشرہ کی عظیم خدمات انجام دیں۔
معروف عالم دین مولانا طارق جمیل نے کہا کہ پیرِ طریقت حضرت پیر ذوالفقار احمد نقشبندی کی وفات سے دل انتہائی رنجیدہ ہے۔ وہ ایک عظیم ہستی تھے جن کی زندگی اللہ کی رضا، دین کی خدمت اور انسانیت کی رہنمائی کے لیے وقف رہی، اور ان کی وفات سے امت ایک بڑے روحانی رہنما سے محروم ہو گئی۔
کشمیری حریت پسند رہنما میر واعظ عمر فاروق نے بھی سوشل میڈیا پر کہا کہ پیر ذوالفقار نقشبندی کا انتقال امتِ مسلمہ کے لیے ایک عظیم دعوتی اور روحانی خسارہ ہے اور مرحوم اصلاحِ نفس اور تزکیۂ قلب کی خاموش مگر گہری خدمت کا روشن چراغ تھے۔
