پاکستان نے سوڈان کے شہر کدوگلی میں اقوام متحدہ کے امن اہلکاروں پر ہونے والے حملے کی شدید مذمت کی ہے۔
وزارت خارجہ کی جانب سے جاری بیان میں کہا گیا ہے کہ پاکستان سوڈان کے شہر کدوگلی میں اقوام متحدہ کی عبوری سیکیورٹی فورس برائے ابیئی (یونِسفا) کے تحت خدمات انجام دینے والے بنگلا دیش کے 6 امن اہلکاروں کی ہلاکت اور متعدد دیگر کے زخمی ہونے پر گہرے دکھ اور افسوس کا اظہار کرتا ہے۔
پی ٹی آئی چھوڑنے والے قاضی انور کے علیمہ خان سے متعلق تہلکہ خیز انکشافات
دفتر خارجہ کے مطابق پاکستان نے اس المناک واقعے پر بنگلا دیش کی حکومت اور عوام کے ساتھ مکمل یکجہتی کا اظہار کیا ہے اور جاں بحق امن اہلکاروں کے لواحقین سے دلی تعزیت کی ہے۔
بیان میں کہا گیا ہے کہ اقوام متحدہ کے امن اہلکار دنیا بھر میں تنازعات کی روک تھام، شہریوں کے تحفظ اور امن و استحکام کے فروغ کے لیے صف اول میں خدمات انجام دے رہے ہیں۔ پاکستان نے امن کے قیام کے لیے اپنی جانوں کا نذرانہ پیش کرنے والے ان بلیو ہیلمٹس کو خراجِ عقیدت پیش کیا ہے۔
پاکستان نے اس بزدلانہ حملے کی فوری اور شفاف تحقیقات کا مطالبہ کرتے ہوئے کہا ہے کہ حملے میں ملوث عناصر کی نشاندہی کی جائے اور انہیں انصاف کے کٹہرے میں لایا جائے۔
دفتر خارجہ کے بیان میں مزید کہا گیا ہے کہ پاکستان اقوام متحدہ کی سلامتی کونسل کے اراکین اور عالمی برادری کے ساتھ مل کر امن اہلکاروں کی حفاظت اور سلامتی کو یقینی بنانے کے لیے اپنی کوششیں جاری رکھے گا۔
