راولپنڈی: پاکستان اور قازقستان کی افواج کے درمیان انسدادِ دہشت گردی سے متعلق مشترکہ فوجی مشق "دوستریم V” کی اختتامی تقریب چراٹ میں منعقد ہوئی۔ دو ہفتے جاری رہنے والی یہ مشق 14 اکتوبر 2025 کو شروع ہوئی تھی، جس میں دونوں ممالک کے خصوصی دستوں نے حصہ لیا۔
پاکستان آرمی کے اسپیشل سروسز گروپ (SSG) اور قازقستان کی اسپیشل فورسز کی ٹیموں نے مختلف جنگی سرگرمیوں اور عملی مشقوں کے دوران بہترین مہارت، نظم و ضبط اور پیشہ ورانہ صلاحیتوں کا مظاہرہ کیا۔
کولیسٹرول کیسے کنٹرول کریں؟ ماہرین کا آسان نسخہ سامنے آگیا
اختتامی تقریب میں کمانڈنٹ اسپیشل آپریشنز اسکول چراٹ مہمانِ خصوصی تھے، جبکہ قازقستان کے سفیر اور دفاعی اتاشی نے بھی شرکت کی اور مشق کے مختلف مراحل کا مشاہدہ کیا۔
اس مشق کا بنیادی مقصد دونوں ممالک کے درمیان انسدادِ دہشت گردی کے اقدامات، حربی طریقہ کار اور تکنیکی تعاون کو فروغ دینا تھا۔ اس کے ساتھ ساتھ یہ مشق پاکستان اور قازقستان کے درمیان فوجی تعلقات کو مزید مضبوط بنانے میں اہم پیش رفت ثابت ہوئی۔
ذرائع کے مطابق، "دوستریم V” مشق نے دونوں افواج کو ایک دوسرے کے تجربات سے سیکھنے، جدید جنگی مہارتوں کو بہتر بنانے اور علاقائی امن و سلامتی میں باہمی تعاون کے فروغ کا موقع فراہم کیا۔
