اسلام آباد میں وزیراعظم نے 27 اکتوبر کو مقبوضہ کشمیر پر بھارتی غیر قانونی قبضے کے خلاف یوم سیاہ منانے کی ہدایت جاری کر دی۔ اس حوالے سے وزیراعظم ہاؤس سے باضابطہ نوٹیفکیشن بھی جاری کیا گیا ہے۔
نوٹیفکیشن کے مطابق ملک بھر میں صبح 10 بجے ایک منٹ کی خاموشی اختیار کی جائے گی، جب کہ یوم سیاہ کے موقع پر کشمیری عوام کے ساتھ اظہارِ یکجہتی کیا جائے گا۔
پی سی بی نے ملتان سلطانز کو معطلی کا نوٹس جاری کر دیا
یاد رہے کہ بھارت نے 27 اکتوبر 1947 کو ریاست جموں و کشمیر پر غیر قانونی قبضہ کیا تھا۔ اُس وقت ریاست کے حکمران مہاراجہ ہری سنگھ نے بھارت کے ساتھ نام نہاد الحاق کے معاہدے پر دستخط کیے تھے، جسے کشمیری عوام نے کبھی تسلیم نہیں کیا۔
اسی روز بھارتی فوج نے سری نگر ایئرپورٹ پر اتر کر وادی کشمیر پر قبضے کا آغاز کیا۔ اس اقدام کو کشمیری عوام اور پاکستان دونوں نے بین الاقوامی قوانین اور تقسیمِ ہند کے اصولوں کی کھلی خلاف ورزی قرار دیا، کیونکہ جموں و کشمیر ایک متنازع علاقہ تھا جس کا فیصلہ اقوامِ متحدہ کی قراردادوں کے مطابق استصوابِ رائے کے ذریعے ہونا تھا۔
پاکستان ہر سال 27 اکتوبر کو یومِ سیاہ کے طور پر مناتا ہے تاکہ عالمی برادری کو یاد دلایا جا سکے کہ بھارت نے کشمیری عوام کے حقِ خودارادیت کو طاقت کے زور پر دبایا ہے۔ اس موقع پر ملک بھر میں جلسے، ریلیاں، سیمینار اور اظہارِ یکجہتی کی تقاریب منعقد کی جاتی ہیں۔
