تہران: ایران نے پاکستان اور افغانستان کے درمیان بڑھتی ہوئی کشیدگی پر تشویش کا اظہار کرتے ہوئے ثالثی کی پیشکش کی ہے۔
ایرانی وزارت خارجہ کے ترجمان اسماعیل بقائی نے اپنے بیان میں کہا کہ ایران دونوں ممالک کے درمیان کشیدگی کم کرانے اور مسئلے کے پرامن حل کے لیے مدد کرنے کو تیار ہے۔ انہوں نے کہا کہ ہر ملک کی علاقائی سالمیت اور قومی خودمختاری کا احترام ضروری ہے، اس لیے پاکستان اور افغانستان کو فوری مذاکرات کرنے چاہئیں۔
ایرانی ترجمان نے زور دیا کہ خطے کے استحکام کے لیے باہمی بات چیت اور تحمل ہی بہترین راستہ ہے۔
اس سے قبل سعودی عرب اور قطر نے بھی پاکستان اور افغانستان کے درمیان حالیہ جھڑپوں پر تشویش کا اظہار کیا تھا اور دونوں ممالک سے تحمل اور بات چیت کے ذریعے مسئلہ حل کرنے کی اپیل کی تھی۔
واضح رہے کہ گزشتہ رات پاک افغان سرحد پر افغانستان کی جانب سے بلااشتعال فائرنگ کی گئی، جس کے جواب میں پاک فوج نے بھرپور کارروائی کرتے ہوئے متعدد افغان فوجیوں کو ہلاک کیا اور کئی پوسٹس تباہ کر دیں۔ رپورٹس کے مطابق پاک فوج نے ایک افغان چیک پوسٹ پر پاکستان کا جھنڈا بھی لہرایا۔
