لاہور: ڈی آئی جی آپریشنز فیصل کامران نے پریس کانفرنس سے خطاب کرتے ہوئے کہا کہ ایک سیاسی جماعت کی جانب سے پرتشدد احتجاج کا سلسلہ شروع کیا گیا۔ ہم نے بات چیت کے دروازے کھلے رکھے مگر یہ جماعت باز نہیں آئی اور اپنے انداز میں احتجاج شروع کیا، جس کے دوران پولیس اہلکار زخمی ہوئے۔
انہوں نے بتایا کہ بڑی تعداد میں پولیس اہلکار لاپتہ بھی ہیں، جبکہ مختلف تھانوں اور سرکاری املاک کو نقصان پہنچایا گیا۔ فیصل کامران کا کہنا تھا کہ ان جتھوں میں پرتشدد رجحان واضح طور پر دیکھا گیا ہے، یہ لوگ عوام کی زندگیوں کو متاثر کر رہے ہیں اور امن عامہ کو نقصان پہنچا رہے ہیں۔
ڈی آئی جی نے کہا کہ اورنج لائن کے اسٹیشن پر چڑھ کر فتح کا جشن منایا گیا، ملک میں انتشار پیدا کرنے کی کوشش کی گئی لیکن لاہور کو اب کلیئر کر دیا گیا ہے۔ ان کے مطابق، جہاں بھی یہ جتھے جائیں گے، وہاں توڑ پھوڑ کریں گے۔
انہوں نے مزید کہا کہ سمجھ نہیں آتی یہ کیسا احتجاج ہے، ریاست اور ادارے اپنا کام کرتے رہیں گے۔ ہم بات چیت کے لیے ہر وقت تیار ہیں، تاہم ریاست ان عناصر سے مؤثر انداز میں نمٹنے کے لیے مکمل طور پر تیار ہے۔
