ایف آئی اے امیگریشن نے اسلام آباد اور کوئٹہ ایئرپورٹس پر کارروائیاں کرتے ہوئے جعلی دستاویزات کے ذریعے بیرون ملک جانے کی کوشش ناکام بنا دی۔ کارروائی کے دوران ایک خاتون سمیت چار ملزمان کو گرفتار کر لیا گیا۔
ترجمان ایف آئی اے کے مطابق راولپنڈی امیگریشن کے عملے نے خاتون سمیت تین مسافروں کو آف لوڈ کیا جن میں سلمان خان، بادشاہ خان اور ارمغان بلخی شامل ہیں۔
تفصیلات کے مطابق سلمان خان اور بادشاہ خان کا تعلق سوات اور دیر سے ہے۔ سلمان خان فلائٹ نمبر PF 718 کے ذریعے عمرہ ویزے پر سعودی عرب جا رہا تھا جبکہ اس کے پاسپورٹ پر سربیا کا جعلی ویزا لگا ہوا تھا۔
بادشاہ خان پی کے 187 پر بحرین کے لیے روانہ ہو رہا تھا۔ اس کے موبائل فون سے اٹلی کا جعلی ریزیڈنٹ کارڈ بھی برآمد ہوا۔ تحقیقات میں پتہ چلا کہ وہ 2023 میں آذربائیجان اور بعد ازاں لیبیا گیا تھا، جہاں سے غیر قانونی طور پر یورپ جاتے ہوئے گرفتار ہوا اور رواں سال ہی پاکستان ڈیپورٹ کیا گیا تھا۔
خاتون ملزمہ ارمغان بلخی پرواز پی کے 749 کے ذریعے فرانس جانے کی کوشش کر رہی تھی۔ اس کا تعلق افغانستان سے ہے، جبکہ اس کی جانب سے پیش کیا گیا سوئس ریزیڈنس کارڈ جعلی نکلا۔
ایف آئی اے اسلام آباد نے تینوں ملزمان کو مزید قانونی کارروائی کے لیے اینٹی ہیومن ٹریفکنگ سرکل اسلام آباد کے حوالے کر دیا۔
دوسری جانب ایف آئی اے امیگریشن ونگ نے کوئٹہ ایئرپورٹ پر بھی کارروائی کرتے ہوئے جعلی دستاویزات کے ذریعے آذربائیجان جانے کی کوشش ناکام بنا دی۔
ایف آئی اے کے مطابق کراچی سے تعلق رکھنے والے ملزم کلیم کمال نے ٹیمپرڈ پاسپورٹ پیش کیا جس کے ویزا صفحات میں ردوبدل کیا گیا تھا۔ تلاشی کے دوران اس کے قبضے سے پولینڈ کا جعلی ویزا اسٹیکر بھی برآمد ہوا۔
ایف آئی اے کوئٹہ نے ملزم کو مزید قانونی کارروائی کے لیے اینٹی ہیومن ٹریفکنگ سرکل کوئٹہ کے حوالے کر دیا۔
