تحریک انصاف کے سیکرٹری جنرل سلمان اکرم راجہ نے کہا ہے کہ گزشتہ روز جو الزامات لگائے گئے ان کی کوئی بنیاد نہیں۔
ایک بیان میں سلمان اکرم راجہ نے کہا کہ جامع حکمتِ عملی بنائی جائے تاکہ معصوم آپریشن میں شہید نہ ہوں۔ ہم دہشت گردوں کو زمین سے ختم کرنا چاہتے ہیں۔
انہوں نے واضح کیا کہ گزشتہ روز اٹھائے گئے الزامات بے بنیاد ہیں۔
دوسری جانب پشاور میں پریس کانفرنس کے دوران خیبرپختونخوا کے صدر جنید اکبر نے کہا کہ اس وقت صوبے میں مینڈیٹ ہماری پارٹی کے پاس ہے، مگر وفاقی حکومت اور ادارے وزیراعلیٰ کے انتخاب میں رکاوٹیں ڈالنے کی کوشش کر رہے ہیں۔
انہوں نے کہا کہ سہیل آفریدی تعلیم یافتہ اور ایماندار رہنما ہیں، پارٹی ان کے ساتھ ہے اور ہمارے 92 ممبران انہیں ووٹ دیں گے۔ علاوہ ازیں دیگر پارٹی رہنماؤں سے بھی رابطے ہیں اور مثبت ردعمل مل رہا ہے۔
جنید اکبر نے علی امین کا شکریہ ادا کیا کہ انہوں نے بانی پی ٹی آئی کے کہنے پر ایک منٹ ضائع نہیں کیا اور استعفیٰ دے دیا۔
پی ٹی آئی خیبرپختونخوا کے صدر نے مزید کہا کہ ہم نے کھل کر کہا ہے کہ طالبان سے بات چیت چاہتے ہیں اور کے پی کے عوام نے ہماری پالیسیوں پر اعتماد کیا ہے۔ عوام کہتے ہیں کہ بات چیت سے مسئلہ حل کیا جائے، اس لیے آئیں مل بیٹھ کر اس کا حل تلاش کریں۔
