گلگت: وفاقی وزیر برائے امور کشمیر و گلگت بلتستان انجینئر امیر مقام سے وزیراعلیٰ گلگت بلتستان حاجی گلبر خان نے وزیر اعلیٰ ہاؤس میں ملاقات کی۔ ملاقات میں حالیہ سیلابی صورتحال، ریسکیو اور ریلیف آپریشنز پر تفصیلی تبادلہ خیال کیا گیا۔
وفاقی وزیر نے بتایا کہ وزیراعظم شہباز شریف خود گلگت بلتستان اور دیگر متاثرہ علاقوں میں ریلیف اقدامات کی نگرانی کر رہے ہیں۔ انہوں نے وفاقی حکومت کے عزم کو دہرایا کہ گلگت بلتستان کے عوام کی سلامتی اور فلاح و بہبود کے لیے ہر ممکن مدد فراہم کی جائے گی۔
انجینئر امیر مقام نے کہا کہ "گلگت بلتستان کے عوام کی فلاح و بہبود ہماری اولین ترجیح ہے”۔ انہوں نے اس بات پر زور دیا کہ قدرتی آفات سے مؤثر طور پر نمٹنے کے لیے وفاقی اور علاقائی حکومتوں کے درمیان ہم آہنگی اور قریبی رابطہ نہایت ضروری ہے۔
وزیراعلیٰ گلگت بلتستان نے بروقت تعاون پر وفاقی حکومت کا شکریہ ادا کیا اور وزیراعظم شہباز شریف کی قیادت میں کیے جانے والے اقدامات کو سراہا۔ ملاقات میں ریسکیو آپریشنز، امدادی سامان کی فراہمی اور متاثرہ کمیونٹیز کی بحالی جیسے اہم امور پر بھی گفتگو ہوئی۔
