اسلام آباد کو سرسبز بنانے کا عزم: چیئرمین سی ڈی اے نے نیشنل پریس کلب میں شجرکاری مہم کا آغاز کر دیا

چیئرمین سی ڈی اے و چیف کمشنر اسلام آباد محمد علی رندھاوا نے نیشنل پریس کلب اسلام آباد میں پودا لگا کر شجرکاری مہم کا باضابطہ آغاز کر دیا۔ اس موقع پر صدر پی ایف یو جے افضل بٹ، نیشنل پریس کلب کے اراکین، سول سوسائٹی اور دیگر شخصیات بھی موجود تھیں۔

تقریب سے خطاب کرتے ہوئے چیئرمین سی ڈی اے محمد علی رندھاوا نے کہا کہ اسلام آباد کو صاف، سرسبز اور جدید شہر بنانے کے لیے اداروں، میڈیا اور سول سوسائٹی کا اشتراک وقت کی ضرورت ہے۔ انہوں نے کہا:
"پریس عوامی مسائل کی نشاندہی کرتا ہے، اور سی ڈی اے ان مسائل کے حل کو ترجیح دیتا ہے۔ ہم پریس کلب کے ساتھ مل کر اسلام آباد کے ہر مسئلے پر کام کریں گے۔”

چیئرمین نے بتایا کہ اسلام آباد میں اس وقت 160 بسیں سڑکوں پر چل رہی ہیں، اور عنقریب گوگل میپس کے ذریعے شہری ان بسوں کی لوکیشن، روٹس اور ٹائمنگز معلوم کر سکیں گے۔
"ہر اقدام نیک نیتی کے ساتھ اٹھایا جا رہا ہے، اور شہریوں کی سہولت ہماری ترجیح ہے،” انہوں نے کہا۔

مزاحیہ انداز اپناتے ہوئے رندھاوا نے تجویز دی کہ:
"جو لوگ پریس کلب میں احتجاج کرنے آئیں، ان سے کہا جائے کہ پہلے ایک ایک درخت لگا کر آئیں!”
اس بات پر شرکاء نے مسکراہٹ کے ساتھ ان کی تجویز کو سراہا۔

صدر پی ایف یو جے افضل بٹ نے اس موقع پر چیئرمین کی کارکردگی کو سراہتے ہوئے کہا:
"جس دن ہماری ملاقات چیئرمین سی ڈی اے سے ہوئی، اسی دن میڈیا ٹاؤن سے بس سروس کا آغاز کر دیا گیا۔ ہم نے صرف درخواست دی اور انہوں نے فوری عملی قدم اٹھایا۔”

افضل بٹ نے اعلان کیا کہ اب نیشنل پریس کلب اسلام آباد کو سرسبز بنانے کے مشن میں قائدانہ کردار ادا کرے گا۔

چیئرمین رندھاوا نے سول سوسائٹی، میڈیا اور شہریوں سے اپیل کی کہ وہ "ون ملین ٹری” مہم میں بھرپور شرکت کریں، تاکہ اسلام آباد کو مزید خوبصورت، سرسبز اور ماحولیاتی طور پر محفوظ شہر بنایا جا سکے۔