پاکستان تحریک انصاف (پی ٹی آئی) نے خواتین کی مخصوص نشست پر مشال یوسفزئی کو سینیٹ کا ٹکٹ جاری کر دیا ہے۔ اس سلسلے میں چیئرمین پی ٹی آئی بیرسٹر گوہر کی جانب سے باضابطہ نوٹیفکیشن بھی جاری کر دیا گیا۔
نوٹیفکیشن کے مطابق، مشال یوسفزئی کو سینیٹ کا ٹکٹ پارٹی کے بانی عمران خان کی ہدایت پر جاری کیا گیا ہے۔ پارٹی قیادت نے سینیٹ کے ضمنی انتخاب کے لیے دیگر امیدواروں کو 30 جولائی تک دستبردار ہونے کی ہدایت دی ہے، جن میں ساجدہ بیگم، مومنہ باسط، سمیرا شمس اور صائمہ خالد شامل ہیں۔
واضح رہے کہ خیبر پختونخوا سے خواتین کی نشست پر سینیٹ کا ضمنی انتخاب 31 جولائی کو ہوگا۔ یہ نشست پی ٹی آئی کی سابق سینیٹر ثانیہ نشتر کے استعفے کے بعد خالی ہوئی تھی، جس کے لیے الیکشن کمیشن نے باقاعدہ شیڈول جاری کیا ہے۔
دوسری جانب، سابق خاتونِ اوّل بشریٰ بی بی کی بہن مریم ریاض وٹو نے ایک بیان میں واضح کیا ہے کہ بشریٰ بی بی نے مشال یوسفزئی کو کسی بھی عہدے یا سینیٹ نشست کے لیے نامزد کرنے کی سفارش نہیں کی۔
مریم ریاض کا کہنا تھا، "میں سو فیصد یقین سے کہہ سکتی ہوں کہ بشریٰ بی بی نے مشال یوسفزئی کے لیے کسی بھی سیاسی کردار یا نشست کی سفارش نہیں کی۔ مجھے معلوم نہیں کہ انہیں کس نے نامزد کیا۔”
انہوں نے مزید کہا کہ ایڈووکیٹ سیف نے پارٹی کے بانی عمران خان کو ایک امیدواروں کی فہرست پیش کی تھی، لیکن ہمیں یہ علم نہیں کہ عمران خان تک کیا معلومات پہنچائی گئیں یا منظوری کن بنیادوں پر لی گئی۔
