آج وفاقی دارالحکومت میں وزیر خزانہ و محصولات سینیٹر محمد اورنگزیب کی زیر صدارت ملک کی بزنس کمیونٹی، چیمبرز آف کامرس اور تاجروں کی تنظیموں کے نمائندوں کے ساتھ ایک اہم اجلاس منعقد ہوا۔ اجلاس میں فنانس ایکٹ 2025 کے تحت متعارف کرائے گئے سیکشن 37 اے اور دیگر متعلقہ معاملات پر تفصیلی مشاورت کی گئی، اور تاجروں کے تحفظات پر سنجیدہ غور و خوض کیا گیا۔
سینیٹر محمد اورنگزیب نے اجلاس سے خطاب کرتے ہوئے کہا کہ حکومت کا مقصد صرف بڑے پیمانے پر ٹیکس فراڈ کی روک تھام ہے، دیانت دار اور جائز کاروبار کو ہراساں کرنا حکومت کی پالیسی نہیں۔ انہوں نے بزنس کمیونٹی کو شفافیت، تعاون اور اعتماد کی فضا کی یقین دہانی کرائی۔
اجلاس میں فیصلہ کیا گیا کہ وزیراعظم کے معاون خصوصی برائے صنعت و پیداوار ہارون اختر خان کی سربراہی میں ایک کمیٹی قائم کی جائے گی، جس میں وزیر مملکت برائے خزانہ بلال اظہر کیانی، وزیراعظم کے کوآرڈینیٹر برائے تجارت رانا احسان افضل خان، چیئرمین ایف بی آر، بزنس کمیونٹی اور چیمبرز کے نامزد کردہ نمائندے شامل ہوں گے۔ یہ کمیٹی آئندہ 30 روز میں مشاورت مکمل کرے گی اور ایک قابلِ عمل اور متفقہ حل وزیراعظم اور کابینہ کو پیش کرے گی۔
اجلاس میں شریک کاروباری نمائندوں نے اپنی تجاویز اور خدشات کھل کر پیش کیے، جنہیں حکومت نے سنجیدگی سے سنا اور تمام فریقین کو اعتماد میں لے کر آگے بڑھنے کے عزم کا اظہار کیا۔ اجلاس میں اتفاق کیا گیا کہ لین دین سے متعلق تاجروں کے خدشات کو دور کرنے کی بھرپور کوشش کی جائے گی اور بزنس کمیونٹی کے لیے اس دوران کسی قسم کی مشکلات پیدا نہ ہونے دی جائیں گی۔
