وفاقی وزیر اطلاعات و نشریات عطا تارڑ نے پاکستان اور بھارت کے درمیان جنگ بندی کی کوششوں میں کردار ادا کرنے والے ممالک کے نام بتا دیے۔
برطانوی میڈیا اسکائی نیوز کو دیے گئے انٹرویو میں عطا تارڑ نے بتایا کہ پاک بھارت حالیہ جنگ بندی مختلف ممالک کی سفارتی کوششوں کا نتیجہ ہے، جنگ بندی کی کوششوں میں چین، سعودی عرب، متحدہ عرب امارات، ترکیہ اور قطر نے اپنا اہم کردار ادا کیا۔
عطا تارڑ نے کہا کہ جنگ بندی کے بعد پاک بھارت ڈی جی ایم اوز کے درمیان پہلا رابطہ ہو چکا ہے، جنگ بندی پاکستان کی کمزوری نہیں بلکہ حکمت عملی کی کامیابی ہے۔
وفاقی وزیر اطلاعات نے کہا کہ امریکی صدر ڈونلڈ ٹرمپ نے دوسری ٹوئٹ میں مسئلہ کشمیر کے حل کیلیے امریکی خواہش کا اظہار کیا، وہ مسئلہ کشمیر کے حل کے خواہاں ہیں۔
انہوں نے کہا کہ بھارت نے پاکستان کو پانی کی فراہمی تاحال بند نہیں کی کیونکہ اس کے پاس پانی روکنے کی صلاحیت ہی نہیں، اس وقت پانی کی فراہمی معمول کے مطابق جاری ہے۔
’پہلگام واقعے پر پاکستان نے افسوس اور ہمدردی کا اظہار کیا، پاکستان نے شفاف تحقیقات میں تعاون کی پیشکش کی لیکن بھارت نے بغیر ثبوت پاکستان پر الزامات عائد کیے۔ بھارت تاحال ایک بھی ثبوت پیش نہیں کر سکا، کسی گروہ نے پہلگام واقعے کی ذمہ داری قبول نہیں کی۔‘
عطا تارڑ نے مزید کہا کہ 7 لاکھ بھارتی فوج کی موجودگی میں پہلگام واقعہ ہونا سکیورٹی ناکامی ہے، بھارتی انٹیلیجنس مکمل ناکام ثابت ہوئی، بھارت پہلگام واقعے کو پاکستان سے جوڑنے میں بری طرح ناکام ہوا۔
ان کا کہنا تھا کہ پاکستان دہشتگردی کے خلاف سب سے بڑی جنگ لڑ رہا ہے، مغربی سرحدوں پر دہشتگردوں کے خلاف کارروائیاں جاری ہیں، دہشتگردی کے خلاف پاکستان نے بے گناہ شہریوں، جوانوں اور افسران کی جانوں کی قربانیاں دیں، پاکستان میں کسی دہشتگرد گروہ کی کوئی محفوظ پناہ گاہ موجود نہیں۔
انہوں نے کہا کہ پاکستان نے بھارتی فوجی تنصیبات اور اسلحہ ڈپوز کو نشانہ بنایا، بھارت کے نقصانات سب کے سامنے ہیں وہ مزید کشیدگی جھیلنے کی پوزیشن میں نہیں تھا۔
