اسلام آباد: قومی احتساب بیورو (نیب) ہیڈکوارٹر میں ایک خصوصی تقریب منعقد ہوئی، جس میں نیب اور اوورسیز پاکستانیز فاؤنڈیشن (او پی ایف) کے درمیان مفاہمت کی یادداشت (ایم او یو) پر دستخط کیے گئے۔ یہ ایم او یو دونوں اداروں کے درمیان باہمی تعاون کو فروغ دینے اور بیرونِ ملک مقیم پاکستانیوں کے مسائل کے حل کے لیے ایک حکمت عملی تشکیل دینے کے لیے تیار کیا گیا ہے۔
او پی ایف کے ڈائریکٹر جنرل (ویلفیئر اینڈ سروسز ڈویژن) لائیقہ امبرین اور نیب کے ڈائریکٹر جنرل (اے اینڈ پی) اظہار احمد اعوان نے چیئرمین نیب لیفٹیننٹ جنرل (ر) نذیر احمد کی موجودگی میں ایم او یو پر دستخط کیے۔ اس موقع پر پراسیکیوٹر جنرل نیب سید احتشام قادر شاہ، چیئرمین او پی ایف بورڈ آف گورنرز سید قمر رضا، منیجنگ ڈائریکٹر او پی ایف محمد افضل بھٹی، نیب اور او پی ایف کے سینئر افسران بھی موجود تھے۔
اس مفاہمت کی یادداشت کا مقصد بیرونِ ملک مقیم پاکستانیوں کے جائیداد کے تنازعات، مالی دھوکہ دہی، اختیارات کے ناجائز استعمال اور دیگر مسائل کو حل کرنے کے لیے ایک مشترکہ فریم ورک تشکیل دینا ہے۔ نیب اور او پی ایف دونوں ادارے مل کر بیرونِ ملک مقیم پاکستانیوں کی شکایات کا جلد اور مؤثر حل تلاش کریں گے۔
ایم او یو کے تحت نیب کے ہیڈ آفس اور ریجنل دفاتر میں بیرونِ ملک پاکستانیوں کے لیے مخصوص سہولت ڈیسک یا سیل قائم کیے جائیں گے تاکہ شکایات کا فوری طور پر جواب دیا جا سکے اور ان کے ازالے کے لیے فوری کارروائی کی جا سکے۔ مزید برآں، نیب اور او پی ایف کے درمیان ہیلپ لائن کے ذریعے بیرونِ ملک پاکستانیوں کے مسائل کو حل کرنے کی کوشش کی جائے گی۔
تقریب میں چیئرمین نیب نے کہا کہ بیرونِ ملک مقیم پاکستانی ہمارے ملک کا قیمتی اثاثہ ہیں اور نیب او پی ایف کے ساتھ مل کر ان کے مسائل کے حل کے لیے ہر ممکن اقدام اٹھائے گا۔ انہوں نے یہ بھی کہا کہ نیب ان افراد کے خلاف کارروائی کرے گا جو اوورسیز پاکستانیوں کے ساتھ دھوکہ دہی کرتے ہیں اور ان کو قانون کے تحت سزا دلوائے گا۔
