اسلام آباد: وزیر اعظم پاکستان، شہباز شریف نے ڈاکٹر سید توقیر شاہ کو اپنے مشیر برائے کیبنٹ ڈویژن بنانے کا حتمی فیصلہ کر لیا ہے۔ اس فیصلے کے مطابق، ڈاکٹر توقیر شاہ کا عہدہ وفاقی وزیر کے برابر ہوگا۔ یہ فیصلہ وزیر اعظم کے قابل اعتماد ساتھیوں کی فہرست میں شامل ڈاکٹر توقیر شاہ کی پیشہ ورانہ صلاحیتوں اور خدمات کو مدنظر رکھتے ہوئے کیا گیا۔
ڈاکٹر توقیر شاہ اس وقت عالمی بینک میں ایگزیکٹو ڈائریکٹر کے طور پر خدمات انجام دے رہے ہیں، جہاں ان کی تعیناتی ابھی دو سال باقی ہے۔ تاہم وزیر اعظم شہباز شریف کے کہنے پر ڈاکٹر توقیر شاہ عالمی بینک سے استعفیٰ دیں گے اور وزیر اعظم کے ساتھ اپنے نئے عہدے پر کام کا آغاز کریں گے۔ذرائع کے مطابق، ڈاکٹر توقیر شاہ عالمی بینک میں پاکستان، افغانستان، الجزائر، گھانا، ایران اور تنزانیہ کے حوالے سے اہم ذمہ داریوں پر فائز تھے اور ان ممالک کے ترقیاتی منصوبوں کی قیادت کر رہے تھے۔
یاد رہے کہ ڈاکٹر توقیر شاہ ماضی میں وزیر اعظم کے پرنسپل سیکرٹری بھی رہ چکے ہیں، تاہم ان کے نئے مشیر کے عہدے پر فائز ہونے کے بعد وزیر اعظم کے پرنسپل سیکرٹری کی سیٹ کو ختم کیا جائے گا۔ اس کے بدلے میں سپیشل سیکرٹری وزیراعظم آفس کو تعینات کیا جائے گا۔ذرائع کے مطابق، ڈاکٹر توقیر شاہ بیوروکریسی کی کارکردگی میں بہتری لانے اور وزیر اعظم کے مختلف منصوبوں کو کامیابی کے ساتھ مکمل کرنے میں اہم کردار ادا کریں گے۔یہ تبدیلی پاکستان کی حکومتی سطح پر ایک اہم پیش رفت ہے، جو ملک کے انتظامی امور کو مزید مؤثر بنانے کی جانب ایک مثبت قدم ثابت ہو سکتی ہے۔
