پاکستان ریلویز نے گزشتہ چھ ماہ کے دوران 46 ارب روپے کی آمدن حاصل کی ہے، جو پچھلے سال کے اسی دورانیے کی آمدن سے پانچ ارب روپے زیادہ ہے۔ اس آمدنی میں اہم حصہ مسافر ٹرینوں، مال گاڑیوں اور دیگر ذرائع سے آیا۔
ریلوے نے مسافر ٹرینوں سے 24 ارب روپے کی آمدن حاصل کی، جبکہ مال گاڑیوں سے 16 ارب روپے کی آمدن ہوئی۔ اس کے علاوہ، لینڈ، کوچنگ اور دیگر ذرائع سے 6 ارب روپے کا ریونیو حاصل ہوا۔
پاکستان ریلویز کے چیف ایگزیکٹو آفیسر (سی ای او) عامر علی بلوچ نے اس کامیابی کو ریلوے کی درست سمت کی طرف بڑھتے ہوئے ایک اہم قدم قرار دیا ہے۔ انہوں نے کہا کہ یہ ریکارڈ آمدن ریلویز کے اقدامات اور اصلاحات کے نتیجے میں حاصل ہوئی ہے اور یہ پاکستان ریلویز کے مستقبل کی بہتری کی طرف ایک مثبت اشارہ ہے۔
عامر علی بلوچ نے مزید کہا کہ 2025 ریلوے کے لیے تبدیلی کا سال ثابت ہوگا۔ وہ اس بات پر پختہ یقین رکھتے ہیں کہ آئندہ سال ریلویز میں مزید بہتری دیکھنے کو ملے گی۔ انہوں نے کراچی کے لیے نئی ٹرین چلانے کا وعدہ بھی کیا اور کہا کہ وہ مارچ 2025 تک یہ وعدہ پورا کریں گے۔
