اسلام آباد – (عامر رفیق بٹ)اسلامی جمہوریہ پاکستان نے پیر کے روز ایتھوپیا اور صومالیہ کے درمیان اختلافات کو حل کرنے کے لیے انقرہ اعلامیہ کا خیرمقدم کیا ہے۔
پاکستانی وزارت خارجہ کے ایڈیشنل سیکرٹری (افریقہ) سفیر حامد اصغر خان اور ترکی میں پاکستان کے خصوصی ایلچی ڈاکٹر جمال بکر کے درمیان ہونے والی ملاقات میں انقرہ اعلامیہ پر بات چیت کی گئی۔ اس موقع پر سفیر جمال بکر نے دونوں برادر ممالک کے درمیان مذاکرات میں ترکی کے اہم کردار کو سراہا اور اسے خطے میں امن، خوشحالی، اور ترقی کی جانب ایک اہم قدم قرار دیا۔
ڈاکٹر جمال بکر نے کہا کہ انقرہ اعلامیہ ایتھوپیا کی حکومت کی جامع خارجہ پالیسی اصلاحات کا مظہر ہے، جو اپنے ہمسایہ ممالک کے ساتھ تعلقات کو مضبوط کرنے اور خطے میں پائیدار امن و ترقی کو یقینی بنانے کے لیے پرعزم ہے۔ انہوں نے مزید کہا کہ اس اعلامیہ کے ذریعے ایتھوپیا کو بین الاقوامی قوانین کے تحت سمندر تک رسائی حاصل کرنے میں مدد ملے گی، جس سے خطے میں استحکام آئے گا۔
انہوں نے اس بات پر بھی زور دیا کہ ایتھوپیا نے اقوام متحدہ کے امن مشنز میں مسلسل شرکت کر کے عالمی امن کے لیے بے شمار قربانیاں دی ہیں، جس سے اس کا عالمی سطح پر اہم کردار اجاگر ہوتا ہے۔
دوسری جانب، سفیر حامد اصغر خان نے انقرہ اعلامیہ کو خطے کے امن اور استحکام کے لیے ایک سنگ میل قرار دیا۔ انہوں نے کہا کہ تمام مسائل کا حل صرف اور صرف مذاکرات کے ذریعے ہی ممکن ہے، اور پاکستان ایتھوپیا کے کردار کو خطے میں امن و استحکام کی فلاح کے لیے اہم سمجھتا ہے۔
ملاقات کے دوران دونوں فریقین نے ایتھوپیا اور پاکستان کے درمیان دو طرفہ تعلقات کا جائزہ لیا اور مستقبل میں ان تعلقات کو مزید مستحکم کرنے کے لیے آئندہ کے اقدامات پر تبادلہ خیال کیا۔ ان اقدامات میں مئی 2025 میں ادیس ابابا میں ہونے والی سنگل کنٹری نمائش بھی شامل ہے، جو دونوں ممالک کے درمیان اقتصادی اور ثقافتی تعلقات کو مزید فروغ دینے کا ایک اہم موقع ہوگا۔
پاکستان نے اس اعلامیہ کے ذریعے ایتھوپیا اور صومالیہ کے درمیان بڑھتے ہوئے تعاون کی حمایت کا اعلان کیا ہے اور امید ظاہر کی ہے کہ اس سے خطے میں امن و استحکام کی فضا مزید بہتر ہو گی۔
