لاہور: سوئی ناردرن گیس پائپ لائنز لمیٹڈ (ایس این جی پی ایل) کے مینیجنگ ڈائریکٹر، عامر طفیل نے لاہور ریجن کا دورہ کیا، جہاں انہوں نے ماڈل کسٹمر سروس سینٹر کا معائنہ کیا اور وہاں کے آپریشنز کا جائزہ لیا۔ دورے کے دوران، انہوں نے کسٹمر سروس کو بہتر بنانے کے لیے موجودہ اقدامات کا تفصیلی جائزہ لیا۔
لاہور ریجن کے جنرل منیجرز نے ایم ڈی کو ریجنز کی کارکردگی کے بارے میں بریفنگ دیتے ہوئے بتایا کہ ٹاؤن بارڈر اسٹیشن (TBS) کی کارکردگی میں بہتری لانے کے لیے میٹرنگ سسٹمز نصب کیے گئے ہیں۔ اس منصوبے کے تحت لاہور میں 691 ٹی بی ایس مکمل طور پر میٹرڈ ہو چکے ہیں، جس کا مقصد گیس کے نقصانات کی مائیکرو سطح پر نگرانی کرنا ہے۔
ایم ڈی عامر طفیل نے کسٹمر سروس آپریشنز کو مزید بہتر بنانے کی ضرورت پر زور دیتے ہوئے کہا کہ صارفین کی سہولت کو یقینی بنانا بہت اہم ہے، خاص طور پر سردیوں کی آمد کے پیش نظر۔ انہوں نے عملے کو ہدایت دی کہ کھانا پکانے کے اوقات میں گیس کی بلا تعطل فراہمی پر توجہ دی جائے۔
یہ دورہ سوئی ناردرن کی جانب سے صارفین کی خدمت میں بہتری کے عزم کی عکاسی کرتا ہے، جس کا مقصد گیس کی فراہمی میں درپیش چیلنجز کا سامنا کرنا ہے۔
