اسلام آباد(نیوزڈیسک)اسپیکر قومی اسمبلی سردار ایاز صادق سے وفاقی وزیر برائے امور کشمیر انجینئر امیر مقام کی ملاقات۔
ملاقات میں 5 اگست کو یوم استحصال کشمیر سمیت باہمی دلچسپی کے دیگر امور پر تبادلہ خیال۔وفاقی وزیر برائے امور کشمیر نے اسپیکر کو 5 اگست کو یوم استحصال کشمیر کے حوالے سے ریڈیو پاکستان سے ڈی چوک تک یکجہتی واک اور دیگر اقدامات کے متعلق آگاہ کیا۔ ملاقات میں 5 اگست یوم استحصال کشمیر کے موقع پر ایوان میں قرارداد لانے پر بھی بات چیت کی گئی۔
اسپیکر قومی اسمبلی نے کہا کہ 5 اگست 2019 کو بھارت کی جانب سے مقبوضہ کشمیر کی خصوصی حیثیت ختم کرنے کی گھنانی سازش کی گئی، پاکستان نے مسئلہ کشمیر کو ہمیشہ ہر علاقائی اور بین الاقوامی فورم پر بھرپور انداز میں اجاگر کیا ہے، تنازع جموں و کشمیر کو حل کیے بغیر خطے میں امن ممکن نہیں،تنازع جموں و کشمیر کا کشمیری عوام کی امنگوں اور یو این کی قراردادوں کے مطابق حل ناگزیر ہے۔
پاکستان کشمیری بھائیوں اور بہنوں کے جائز حقوق کے حصول کے لیے انکی پارلیمانی، سفارتی، اخلاقی اور سیاسی حمایت جاریرکھے گا۔
